Tags: Rustenburg, Herald, club recipes cooking rotary

Die uitleg-span se Werkende Mamma Tuna Poffers

Written by Liesl. Posted in Local Eateries

Die Rustenburg Herald het met hierdie week se resep sommer twee vlieë met een klap doodgemaak: ‘n “Rustenburg Herald raak die klits kwyt”-uitgawe vir hierdie week waarin een van die koerant se mees noodsaaklike departemente deelneem en ‘n vinnige, maklike resep vir die besige werkende mamma.
Die Rustenburg Herald se uitlegspan werk nie net daaraan om te verseker dat u hierdie koerant en die 30 000 ander eksemplare van hierdie week se koerant kan geniet nie maar doen ook die grafiese ontwerp vir verskeie van ons ander susters-koerante soos Brits Pos, Noordwester, Stellalander, Gemsbok, Mahikeng Mail en die Agri-Pulse.
Dit is maklik oor die 100 000 koerante per week waaraan hierdie dames werk – en dan moet hul nog kos maak in die aande!
Om daardie rede het hul besluit om ‘n ou gunsteling vir die Rustenburg Herald te maak – ‘n tuna-poffer wat in ‘n skilferkorsdeeg voorberei word.
Hierdie ete is basies net meng en gooi in die oond (onthou net om dit uit te haal!). Dit is perfek vir wanneer jy twee besige kinders in die huis het, plus een op die heup en nog een op pad soos hul sê. Geniet hom!

Bestanddele:
1 blik tuna, gedreineer
2 eiers
½ koppie kaas, gerasper
1 eetlepel pietersielie
80 ml room
Skilferkorsdeeg

Metode:
Spuit ‘n muffin-pan met Spray & Cook uit en sny die skilferkorsdeeg in vierkante.
Voer holtes van die pan met die deeg. Meng die bestanddele saam en skep lepels vol in elke holte. Bak teen 180°C vir 15 tot 20 minute tot goudbruin.
Sit voor met n lekker mengelslaai en geniet ‘n wonderlike ete vir die besige werkende moeder.

 

 

 

Refinement se “Healthy wammy”

Written by Liesl. Posted in Local Eateries

In hierdie week se uitgawe van “Raak die ‘klits’ kwyt” het “ons” ‘n heel besondere en oorspronklike lekkerny op die spyskaart. Onthou julle die twee oulike dames van Refinement Clinic wat onlangs in die Herald was met hulle Mandeladag-projek toe hulle met gesofistikeerde apparaat vir vroeë tekens van kanker op die uitkyk was? Wel, vandeesweek is Annabel Snyman en Kushcé Niemand terug op hul pos – maar hierdie keer met die resepteboek, voorskote en bakpoeier. Al gehoor van ‘n “Wammy” – ‘n hamburger (“hammy”) met ‘n wafel-“bun” instede van die konvensionele broodjie. Dit is absoluut heerlik maar ook pure gesondheid, so lig die glasies – ons maak dit so!

Kuschcé en Annabel se “Wammy” (wafel-hamburger)                                                        

Vir die wafel-“buns” gebruik ons doodgewone wafel wat jy in hamburger-grootte “broodjie” sny as jou wafelpannetjie dit nie “klein” genoeg kan bak nie. As jy hou van eenvoud en maklik kan jy sommer jou wafelbroodjies koop – anders bak jy dit so:

Gewone wafelresep en metode

2 eiers
125 ml suiker
100 ml olie/gesmelte botter
500 ml koekmeelblom
30 ml bakpoeier
50 ml verromer
1 ml sout
5 ml vanielje
300 ml water
Voeg by sowat 125 g grofgerasperde Cheddar-kaas (opsioneel). 

Wammy "patty"

500 g maalvleis
2 tlp BBQ speserye
2 tlp ”Steak & Chop-speserye
2 tlp Chakalaka-speserye (opsioneel)
Sout en peper na smaak
2 tlp gemengde kruie
2 eetlepels blatjang
2 eetlepels Worcestershire-sous
1 eier 

Metode

Meng bestanddele goed deur. Rol ‘n bolletjie maalvleis sommer so in die hand, druk mooi plat om ‘n “patty” te vorm. Braai in voorverhitte pan.

Garnering

As basis vir jou “wammy” gebruik jy gesnyde/gebakte wafel en jou maalvleis-“patty”. Vir die res van die garnering gebruik jy blaarslaai, tamatie, gebraaide uie, Cheddar-kaas (dun snytjies) en Guacamole (fyngemaakte avokado en suurlemoenpeper na smaak). Dan ook gebraaide rugspek, kaassous/sampioensous/BBQ-sous. Kushcé-hulle het sommer ‘n paar stukkies “chips”/Doritos/”crisps” gebruik die prentjie mee af te rond – om van die ekstra-smakie nie te praat nie. Baie gesond, baie lekker en heerlik vullend!

Bosveld-gasvryheid by Raasblaar Lodge

Written by Liesl. Posted in Local Eateries

As 'n "groterige" stad het Rustenburg vir jare al meer as genoeg restaurante en formele of informele eetplekke waar mense (al is dit net vir die etensuur) hul gejaagde roetines kan ontvlug en vir 'n verandering 'n ander spyskaart as dié by die huis onder oë kan kry. As daar een enkele pluspuntjie is van die resessie-agtige ekonomie van die afgelope paar jaar, is dit die inisiatief wat in mense na vore gekom het om gedaante te gee aan die sake-gestaltes wat elkeen van ons seker maar op een of ander manier het. Raasblaar
Lodge is 'n heerlike luilekker-kuierlekker restaurant, kuierplek en gastehuis sowat 25 km vanaf Rustenburg waarvan jy 'n prominente aantekening moet maak vir wanneer die "wanderlust" jou weer beetpak. As jy links of regs draai op die Kromrivier-pad net anderkant die ou Wigwam, is dit na 400 m aan jou linkerkant. Met ons eerste kuiertjie daar verlede week, het ons sommer 'n klompie bekende Rustenburgers raakgeloop wat sommer op gereelde basis uit hul gebaande Rustenburgse weë wegbreek om hier in 'n hartlike Bosveld-atmosfeer te kom ontspan. 
Clarence en Amanda Rossouw is hier aan die stuur van 'n egte familie-onderneming wat almal handjie bysit om veel meer as die pot aan die kook te hou.
Maar een ding is seker - Raasblaar se mense weet hoe om heerlike kos te maak en jy gaan nie 'n pyn op die maag kry wanneer jou rekening kom nie. (Vra vir Clarence hoekom jy vir "Kallie" op die uitkyk moet wees...). 
Rustenburg Herald se "raak die 'klits' kwyt" is op heerlike "Chicken Schnitzel" getrakteer - een van die gunstelinge by Raasblaar waar daar 'n groot verskeidenheid op die spyskaart is.
Jy kan ons glo - jy sal bly wees as jy die gesin, of vir "ma" vir 'n heerlike ete en 'n kuiertjie gebring het. As jy laatslaap, bring "ma" dalk vir jou... 
Maar ja, kuier is een ding en kosmaak 'n ander - Clarence en sy chefs het hul geheime vir 'n lekker Schnitzel met ons gedeel as jy dit hierdie naweek dalk tuis wil probeer of wil wag tot Boet of Sus van die kollege af huis toe kom voordat julle volgende keer Raasblaar toe gaan. 

Geurige "Chicken Schnitzel" 
(4 porsies)

Jy benodig: 

4 Schnitzels 
4 repies spek (bacon)
500 ml Raasblaar-kaassous
Cheddar-kaas
Feta-kaas

Raasblaar-kaassous
1/3 koppie botter
1/3 koppie koekmeel
1/2 teelepel sout
1/4 teelepel peper
knippie neutmuskaat
1 eetlepel brandewyn (opsioneel)

Smelt botter oor matige hitte. Roer meel by en roer goed deur. Voeg melk bietjie-vir-bietjie by en roer deurentyd. Voeg kaas by en kook saggies vir 5 minute. 

Chicken Schnitzel
4 hoenderborsies
500 g broodkrummels
500 g koekmeel
sout en peper
4 eiers

Kap hoenderborsies tot lekker dun met vleishamer. Geur na smaak met sout en peper. Rol in eier en dan in koekmeel. Rol dan weer in eier en dan in die broodkrummels. Laat oornag in yskas. Diepbraai in olie tot goudbruin. Pak in lagies soos volg: Hoender Schnitzel, Raasblaarsous, spek, kaas, Raasblaar-sous, en krummel laastens Feta-kaas bo-oor. Bedien warm met 'n slaai of bykos van jou keuse. Lekker broodslaai en kaas soos by Raasblaar of sommer eenvoudige aartappelslaai werk uitstekend. 
Raasblaar is ook goed bekend vir hul buffet-etes op Sondae (12:00 tot 15:00) - hoe klink twee vleisdisse, vyf groentes en geurige nagereg teen slegs R85 p/p. Besprekings is nie nodig nie tensy julle 'n baie groot groep is. 
Ander spesialiteite is Eisbein - R95, die hoender Schnitzel wat ons bestel het (R89) en as jy sommer net lus het vir 'n drankie en 'n kuiertjie met dalk 'n eetdingetjie tussen-in - 'n GROOT Raasblaar-burger teen R75. Ons kan Raasblaar met vrymoedigheid aanbeveel - op Saterdag 5 Augustus, tree Clive Bruce by Raasblaar op. Hoekom bespreek jy nie nou al vir jou 'n tafel nie? Skakel Raasblaar by 076 566 4803 of 076 789 9852. 

Kom rol uit Barrel & Bull se vaatjie en smul aan bekostigbare etes

Written by Liesl. Posted in Local Eateries

In die koue wintermaande is pasteie baie gewild en gelukkig vir die kosmakers is daar in Suid-Afrika sommer ‘n hele rits om van te kies. Ons het onlangs vir ons lesers gewys hoe om die immergewilde herderspastei te maak. Vandeesweek maak ons ‘n nuwe variasie – al gehoor van ‘n “Dixie Pie?” Wel – ‘n Dixie-pastei is een van talle spesialiteite by die Barrel & Bull – die voormalige Keg & Bull by die Safarituine-inkoopsentrum.

Stephan Schoeman is nie net die langste man in die hele vaatjie (Barrel) nie, hy is toevallig ook die man aan’t stuur van sake in die kombuis. In ons weermagdae het is die “pannetjies/kastrolletjies waarmee ons in die bos moes kosmaak, ‘n “Dixie” genoem. Wat ons onmiddellik hier kan opmerk is dat die Barrel & Bull se Dixie-pastei die groot weermag-dixie met gemak sal vol lê…

‘n Dixie-pastei is ‘n tuisgebakte pastei met sappige hoender, romerige spinasie, Mozzarella-kaas, en gekapte Jalapeno-rissies. Dit word bedien met sterk (spicy) sampioensous of bruin uiesous en skyfies of kapok-aartappels, maar as jy dit by die huis wil maak, dis op jy net waarvoor jy lus het.

Die Barrel & Bull se Dixie-pastei word soos volg gemaak:

Kraaklekker Dixie-pastei

Bestanddele:

1 Skyfie blaar-bakdeeg
1 koppie spinasie
Ongeveer 50 g hoenderfillette in blokkies gesny
1 koppie witsous
15 g Mozzarella-kaas
Die helfte van ‘n Jalapeno-rissie in skyfies gesny
1 eetlepel Napoli-sous
1 teelepel Aromat
1 teelepel gekapte, gedroogte chillies (Onthou hierdie bestanddele kan alles aangepas word volgens smaak of porsie).

Metode:

Braai die hoenderblokkies en voeg gekapte, gedroogte rissies by. Voeg die Aromat by en braai die hoender tot goudbruin. Kook spinasie tot gaar en maak solank jou witsous eenkant. Voeg dan die hoenderblokkies, spinasie en witsous alles bymekaar. Neem ontvriesde blaardeeg en plaas op ‘n skoon gladde oppervlak. Skep die hoender- en spinasievulsel bo-op die blaardeeg maar slegs op een helfte.

Smeer die Napoli-sous bo-oor die mengsel. Sprei die kaas bo-oor die Napoli-sous. Sprei die skyfies Jalapeno eweredig bo-oor. Vou blaardeeg bo-oor mengsel en vorm die pastei in ‘n netjiese vorm. Steek met ‘n vurk ‘n klompie gaatjies in die deeg sodat die hitte en stoom egalig kan ontsnap.

Smeer die pastei met eiergeel net voor jy dit in ‘n vooraf-verhitte oond (180 °C) plaas. Bak pastei vir sowat 25 minute tot goudbruin aan die bokant. Bedien met die bykos van jou keuse. By die Barrel & Bull het jy ‘n keuse tussen kapok-aartappel of skyfies en selfs ‘n slaaitjie.

Onthou daar is baie spesiale aanbiedinge by die Barrel & Bull: Wat vir ons veral lekker en billik geklink het, was die Maandae “special” naamlik – koop ‘n burger en kry een gratis vir slegs R65. ‘n Hoogtepunt veral na ‘n besig naweek is die heerlike Sondag-middagetes – egte boerekos soos jou ma dit gemaak het: 2 x vleisdisse met twee groentes, ‘n slaai en ‘n nagereg teen slegs R82.00 per persoon of R38.00 per kind onder 12 jaar. Miskien moet julle hierdie Sondag tussen 12:P00 en 15:00 gaan inval? Jy hoef nie eens te bespreek nie!

Vantage Point kry Japannese baadjie...

Written by Liesl. Posted in Local Eateries

Nog net 'n bietjie meer as 'n week voordat Vantage Point se World Food Festival by die gemeente skaars 2 kilometer vanaf die Waterfall Mall op 26 Mei vanaf 17:30 aangebied word. Ons is nou al die afgelope vier weke besig met 'n kort reeksie oor internasionale geregte, happies, lekkernye en wat ook al wat onder meer by die WFF op die spyskaart gaan wees. Geregte en lekkernye soos hierdie het verlede jaar 'n stormloop veroorsaak toe Rustenburgers die tafels in minder as twee ure gestroop het en laatkommers teleurgesteld moes huis toe gaan. Vanjaar is dit sekerlik nie nodig om voornemende gaste te waarsku om sommer lekker vroeg te kom en soos verlede jaar die inkopiemandjies saam te bring nie.

'n Internasionale lekkerny wat die laaste paar jaar ook in Suid-Afrika besig is om groot veld te wen - is sushi - het jy geweet hoe heerlik en gesond sushi is? Hannes van Heerden en sy span van Food Lovers Market in Rustenburg se "Sushi Bar" gaan een van talle "formele" restaurante/voedselverspreiders wees wat 'n stalletjie by die WFF gaan beman en gaan ongetwyfeld 'n groot slag slaan. Sushi is nie die heel maklikste happie om self te probeer nie, maar as jy 'n bietjie kunstenaarsbloed en aanvoeling in jou are het, gaan jy dalk 'n paar randjies bespaar. As jy dus nie aanstaande Vrydag by Vantage Point se World Food Festival kan inloer nie, kan jy dalk dié oulike resep van Food Lovers Market tuis probeer. Hier's 'n maklike resep om California Rolls te maak...

California Rolls

Bestanddele (vir 8 porsies)
1 avokado
4 Nori-velle
2 koppies Sushi-rys
Sesame-sade
Komkommer
"Crab sticks"
Pekel gemmer
Wasabi
Sojasous

Metode

Was en spoel sushi-rys 4 keer. Week die rys vir 10 minute in skoon water. Kook die rys vir 30 minute en laat stoom vir nog 30 minute.
Meng die rys met 2 eetlepels rysasyn terwyl die rys nog warm is. Vou die Nori-velle in die helfte en skeur in 2 gelyke dele.
Maak hande nat sodat rys nie aan hande vassit nie. Sprei die rys oor die Nori-vel sodat dit dieselfde dikte oor die hele vel is.
Sprinkel sesame-sade oor die rys. Draai nou die Nori-vel om sodat rys na onder is en sit dit op 'n sushi-matjie neer. Sit nou repies komkommer, "crab sticks", wortel, salm, garnale en avokado in die middel - enige kombinasie kan gebruik word.
Gebruik nou die sushi-mat om die rys op te rol sodat die vulsel na binne is.
Druk effe met vingers om die rol lekker ferm te maak. Sny die rol in gelyke dele.
Versier bord met pekel, gemmer en wasabi. Gooi 'n bietjie soja-sous in 'n bakkie en doop jou happie in die sousie voor elke happie.
Jou vriende en familie gaan ongetwyfeld baie beïndruk wees as jy hierdie happie voorsit -
as dit 'n rugbydag is met die hoofwedstryd wat later wag, kan dit 'n ideale voorgereg wees - jy sal egter verbaas wees oor hoe vullend sushi is, so moenie die steak te dik sny nie...
Sien jou by Vantage Point se World Food Festival op Vrydag, 26 Mei. Ons het reeds gesê - die deure open om 17:30 - kom vroeg!

search our recipes