Bose kringloop moet gestuit word

Posted in Letters

Leser, via e-pos - Die laaste paar weke is die koerant se brieweblaaie weer vol met klagtes oor ’n plaaslike kontrakteur wat met klomp beloftes mense se arm draai om vir hom geld te gee in ruil vir “dienste gelewer’’.
Laat my toe om my stuiwer in die armbeurs te gooi. Dit is nie die eerste keer dat hierdie selfde manne in Klerksdorp Rekord as bedrieërs en swendelaars uitgekryt word nie. Dit gaan al vir jare aan. Tog gaan dit my verstand te bowe dat hierdie manne nog toegelaat word om dit te doen. Hoe kan die polisie net ’n blinde oog draai? Lees hulle dan nie die koerant nie?
En wat help dit julle skel die redakteur uit oor sy hulle advertensies plaas? Watter gronde het sy om hul advertensies te weier? ’n Spul briefskrywers wat dom genoeg was om vir hierdie kontrakteurs geld te gee voordat enige werk gelewer is. En dan koerant toe hardloop om daar te huil oor die advertensie daar geplaas is.
Sou Klerksdorp Rekord wel weier om hul advertensies voortaan te plaas, wat dink julle sal dan gebeur? Gaan hierdie ouens ophou skelm wees? Gaan hulle minder mense bedrieg? Of gaan hulle maar net ’n ander plek soek om hul advertensies te plaas - dalk ’n kennisgewingbord by jou plaaslike supermark of op die internet? Wie moet dan die blaam dra as jy vir hul slim storietjies val?
Ek stem dit is tyd dat hierdie manne se tjank vir eens en vir altyd afgetrap word, maar hoekom die blaam verskuif na die koerant of die redakteur?
Doen self iets. Weier om nee vir ’n antwoord te vat by die SAPD. Gaan sien ’n staatsaanklaer. Win regsadvies in. Span saam met nog ander klaers en kry ’n interdik teen hierdie manne. Dit gaan jou niks in die sak bring om briefies te skryf nie, more oormore is hierdie koerantpapier toiletpapier en doen die bende klaar weer iemand anders in - dis ’n bose kringloop.

My storie van hoop

Posted in Letters

Corlia Stoop, Klerksdorp - ‎Ek was 10 toe my pa oorlede is aan ’n hartaanval, vandaar was dit net ek, my ma en twee boeties wat die lewe ‘geface’ het deur moeilike en maklike tye.
My ma het gebak om ons aan die lewe te hou en op ’n stadium het my ma alles verloor en met tyd weer van voor af goedjies bymekaar gemaak.
In 2012 is ek getroud en het die pragtigste dogtertjie. Sy is die lig in my lewe. Ek glo my pop gaan nie nou terwyl sy klein is in ’n kleuterskool wees nie, so ek maak haar op my eie groot, ek werk van die huis af en is trots om te sê ek borsvoed nou al vir 22 maande.
Ek verkoop Avon, verkoop voertuie van die huis af vir mense en brei serpe. 
Ek wou nog altyd studeer, maar my finansies het dit nooit toegelaat nie.
Verlede jaar in November het ek vir my ma gesê hierdie jaar is die jaar wat ek iets agter my naam kry. Al is dit iets kleins dit is groot vir my.
2015 het gekom en Februarie het ek my eerste vak begin doen, nl Bookkeeping to trial balance.
Ek het my eksamen geslaag met 87%. Ek was so trots op myself. Ek wou baie graag verder gaan toe besluit ek, ek kan kopbande uitmaak.
Ek doen so goed met my kopbande dat ek hierdie maand al met my derde vak begin het, my kopbande betaal alles. 
So in die oggend hardloop ek rond, speel met my pop en heeltyd is my breinaalde in my hande besig om my bestellings klaar te maak.
Ek het vir myself gesê ek gaan nie ophou studeer tot ek nie ’n Finansiële Rekenmeester is nie.
Ek het nog ‎10 vakke oor om te doen so ek gaan nog baie kopbande brei, maar niks kry my onder nie. Ek het te lank gewag om iewers te kan kom.
Ek wil hê my dogtertjie moet trots wees op my en vir haar ’n groot voorbeeld stel.
Ek wil persoonlik vir Centurion Akademie in Wilkoppies dankie sê dat hul my die geleentheid gee om my studies te kan voltooi deur te betaal soos ek my kopbande verkoop
kry.
Ek kan enige een aanbeveel om te studeer by hulle, want almal daar is great mense, jy voel sommer tuis by hulle.
En ek wil vir die mense daar buite sê, maak nie saak hoe rof jou lewe was of is nie, as jy die wil het om iewers te wil wees, sal niks jou onder kry nie.
Wees positief en hou Jesus aan jou sy, want sonder Hom, sou ek dit nie kon doen nie. Dankie aan almal wat my ondersteun met my kopbande om my studies sover te kan betaal.

UA-34805051-1 UA-34805051-1