GEMSBOK-UPINGTON: Die Dawid Kruiper Plaaslike Munisipaliteit het omtrent sy hande vol met vandale wat publieke geboue, fassiliteite en eiendom wat aan die munsipaliteit behoort, teiken en verwoes.
Dawid Kruiper het na Gemsbok uitgereik om hul boodskap aan die gemeenskap oor te dra.
Patrick Williams, kommunikasie hoof van DKM skryf:
“Vandalisme van munisipale eiendom is die opsetlike beskadiging of vernietiging van openbare bates, insluitend geboue, infrastruktuur en toerusting. Dit beïnvloed die gemeenskap deur dienslewering te belemmer en die koste vir herstelwerk en vervangings te verhoog. Vandalisme is ‘n misdaad met potensiële regsgevolge, insluitend boetes en gevangenisstraf. Dit is ‘n kriminele oortreding.”
Williams verduidelik dat deur skade aan infrastruktuur, soos verkeersligte of waterpype, te veroorsaak, dit noodsaaklike dienste soos vervoer en watervoorsiening kan ontwrig.
Hy sê DKM staar aansienlike uitgawes in die gesig om beskadigde eiendom te herstel of te vervang, wat uiteindelik belastingbetalers raak.
“Vandalisme lei tot verhoogde koste op munisipale dienste wat dan die verbruikers raak wat meer vir munisipale dienste moet betaal. Die vandalisme van munisipale infrastruktuur kan die plaaslike ekonomie benadeel deur besighede te ontwrig, toerisme te beïnvloed en die koste vir infrastruktuurherstelwerk te verhoog,” skryf Williams.
Skade aan infrastruktuur soos verkeersligte of straatligte kan veiligheidsgevare skep, wat tot ongelukke en beserings lei. Die afwesigheid van ligte kan lei tot die toename van kriminele aktiwiteite in die residensiële en sakegebiede.
Vandalisme kan gemeenskapstrots ondermyn en belegging in openbare ruimtes ontmoedig.
Die volgende kan gemeenskapstrots ondermyn: * Graffiti op munisipale geboue of openbare kuns wat nie deur die munisipaliteit goedgekeur is nie * Skade aan straatligte of verkeersseine. * Diefstal van kabels of ander waardevolle materiaal van munisipale eiendom.
* Vandalisme van parke en ont-spanningsgeriewe. * Die breek van vensters of deure van munisipale geboue. * Onwettige storting van vullis op openbare grond.
Williams sê die gemeenskap moet vandalisme aanmeld en eienaarskap van openbare ruimtes neem - om sodoende vandalisme te voorkom.
“Dit kan help om oortreders af te skrik. Vandalisme kan aangemeld word op die D.K.M. 24-uur-oproepsentrumnommer, wat 054-338 7000 is.”
Intussen sal DKM verhoogde sekuriteitsmaatreëls en verhoogde patrollies implimenteer.
“Inwoners moet enige vandalisme-dade aan die munisipaliteit of die SAPD rapporteer. Dit kan ons help om die probleem vinnig aan te spreek. Gesamentlik moet die munisipaliteit en die gemeenskap verseker dat vandale aanspreeklik gehou word vir hul optrede deur middel van toepaslike wetlike maatreëls. Ons moedig die gemeenskap aan om voorvalle van vandalisme aan te meld sodat die wetstoepassing kan optree.”
