“Landdroskos”

Posted in Pork Recipes

Nouja, die tyd om die braaivure te stook en te midde van soel somerdae (of aande) saam met vriende in die lapa te ontspan is vinnig besig om onder ons “uit te hardloop” soos die jongmense sê. Vir diegene wat nou al byna die hele somer met die idee in die agterkop loop om so-ens-so vir daardie lank-beloofde “braai” te nooi, is hierdie nou net die geleentheid waarvoor u gewag het.

Wie hou nie van ‘n eisbein wat lekker lekker krakerig en bros maar sappig “gebraai” is nie? Nee kyk, dit is nie maklik om ‘n smaaklike eisbein te klop nie en boonop is dit ‘n gereg wat vir ‘n verandering nie op die konvensionele braaivuur gaargemaak word nie – dus sal die winter jou nie met jou braaitang om die enkels vang nie.

So kort voor die winter van 2011 ons vanjaar tref het ons span van “Raak die ‘klits’ kwyt” by Landdros Restaurant en Gastehuis (in Landdrosstraat natuurlik) aangesit vir ‘n smaaksensasie waarvoor ons om die waarheid te sê nie heeltemal voorbereid was nie. Hier word ‘n man se asem byna weggeslaan met die heel eerste happie van ‘n werklik voortreflike eisbein – loshande die beste wat tot dusver geproe het – met respekte gesê aan alle ander restaurante en braaimeesters wat hul uitgee as kundiges by die braaivuur.

Elk geval – om ‘n eisbein “korrek” voor te berei – is nie “sommer net nie” – sal ‘n mens vinnig hoor by dié wat weet. Daarom dat ons onsself nie slim hou nie en geduldig wag totdat die sjef met sy verrassing en ‘n breë glimlag by ons tafel opdaag. Ons kon nie anders nie as om vir Rudi (van der Westhuizen) en Ferdie (Minnaar) te sê welgedaan manne – dit is ongetwyfeld ‘n wenresep! Vir ons lesers kan ons sonder huiwering sê – moenie langer uitstel nie – nooi daai vrinne so gou moontlik en doen dit soos volg:

Diepgebraaide Eisbein
1 (of soveel jy wil) 800g – 1 kg gerookte eisbein; 
Lourierblare, tiemie en swart korrelpeper vir kookproses;
Per porsie die volgende:
1 koppie suurkool;’
1 koppie suurroom;
‘n klompie medium-grootte aartappels;
‘n smaaklike bedruipsous van jou keuse;

Metode
Die belangrikste van alles by eisbein is die vooraf-kookproses. Eisbein word vir ongeveer 45 minute in ‘n mengsel van kruie, onder meer lourierblare, heelswartpeper en tiemie gekook. Na die kookproses moet die eisbein vir ongeveer 1 uur “rus”.

Diep kepe word nou tot op die been gesny om te verseker dat die eisbein met die diepbraaiproses tot op die been gaar word. Die eisbein kan nou gevries word en wanneer benodig, kan dit eenvoudig ontdooi en verder voorberei word.

Die eisbein word nou vir ongeveer 5 minute in warm olie gebraai. By Landdros word die eisbein natuurlik met “Landdros-bedruipsous” afgerond om dit ‘n heerlike smaak en glans te gee. Jou eisbein word bedien met 2 gekookte aartappels met lekker vars suurroom en ‘n stewige porsie suurkool. Bon appétit!

Smaaklike varkrib oor die braaivuur

Posted in Pork Recipes

Sjoe - die feesgety is darem maar ‘n tyd van oorvloed en oordadigheid. Op spesiale geleenthede soos Kersfees en Nuwejaar is dit mos nou maar ‘n ou Suid-Afrikaanse en internasionale tradisie dat daar vir ‘n vale om kreunende tafels gekuier word terwyl die glasies hoog gelig word. En is dit nie ‘n paradoks om op te merk dat hoe moeiliker die jaar agter die rug - hoe voller die tafels en hoe hoer die glasies nie?

Ja, dit is nou maar eenmaal in die mens se aard dat hy hom nie maklik laat onderkry nie en dat joligheid en vrolikheid ‘n goeie manier is om van al (of van die meeste dan...) slegte dinge oor die afgelope jaar te vergeet. Net so met goeie dinge, daarom dat ‘n goeie jaar ook met oordadigheid gevier word en dat feesdae soos Kersfees en Nuwejaar ‘n tyd is wat nie maklik vergeet word nie.

Maar kom ek wed jou jy kan amper nie eers die helfte van al die lekker eetgoed, resepte, spesialiteite en “delicatessen” (as ek dit nie mis het nie - oorspronklik ‘n Duitse woord?) rondom die feestelike tafels onthou nie. Wat nog te sê van skep en proe!
Vir die ouens wat vanjaar amper alles geproe het, het ons vandeesweek (hopelik) so ietwat van ‘n verrassing...

Rudi en Yolandi van Dyk (eintlik |Rudi) spog met ‘n baie spesiale (geheime) resep vir sappige, geurige en heerlike varkribbetjie. En ja, Rudi is die eerste ou wat vra “waar in jou lewe het jy nou al so ‘n lekker varkrib geproe?” (sonder om hoegenaamd verwaand te klink. Miskien sal nie almal noodwendig saamstem nie, maar Rudi het beslis ‘n punt beet. Hierdie varkrib is ongetwyfeld iets spesiaal. Dit is sonder enige twyfel aan te bevole dat jy hierdie “geheime” resep van Rudi en Yolandi uitknip en in jou eie (geheime?) resepteboek plak. Trakteer jou vriende of skoonma volgende keer hiermee en jy sal beslis ‘n paar ekstra punte in jou “boek” hê... Rudi maak sy varkrib soos volg:

Bestanddele
800g (of meer) varkribbetjie; 
‘n halfkoppie tamatiesous;
1/3 koppie goeie soetrissiesous;
1/3 koppie “hot” soetrissiesous;
2 knoffelhuisies;
Dan ook ‘n paar handevol slaaiblare en ‘n stewige knoffelbroodjie;
‘n Avokado of twee;
Een of twee tamaties;
Soetmelk of Cheddar-kaas;

Metode
Die hoofbestanddeel is natuurlik die varkrib - daarom dat dit die meeste aandag kry. Sny jou varkrib in mooi groterige porsies - net soos jy meen jou gaste sal daarvan hou. Maak ‘n smaaklike marinade uit die twee soetrissiesouse, die tamatiesous en die knoffel. As jy of jou gaste nie van knoffel hou nie, kan jy dit uitlaat - die knoffel word nogtans aanbeveel...

Sorg dat jou braaivuur betyds aangesteek is en dat jou kole op die regte tyd gereed is. Braai jou ribbetjie op matige kole en smeer mildelik met jou marinadesous. Onthou - ‘n varkribbetjie word vinnig gaar - pasop vir oorgaar. Die vleis moet verkieslik nog lekker sappig wees. Smeer weer met die marinade wanneer die rib van die vuur gehaal word. Sit vroegtydig ‘n paar snytjies kaas op jou gesnyde knoffelbroodjie en laat lekker in warm oond smelt. Bedien effens warm saam met jou varkribbetjie. Maak ‘n heerlike slaaitjie met die avokado, tamaties en blaarslaai en laat elke gas vir homself skep - net soos by ‘n gewone braaivleis. Lekker eet en sê “gesondheid!”

search our recipes