STELLALANDER-VRYBURG: Die eerste uitgawe van die Track en Field hoërskool-atletiekreeks kom tot ’n spoggerige einde met die nasionale finaal wat op Donderdag, 10 April en Vrydag, 11 April by die Universiteit van Johannesburg se Atletiekstadion plaasvind.
Gedurende die jaar is nege byeenkomste in elkeen van Suid-Afrika se provinsies gehou. Dit het jong atlete die geleentheid gegee om hul talent te wys en skole wat selde aan topvlak-atletiek deelneem, die kans gebied om hul staal te wys. Om deelname so inklusief moontlik te maak, het die organiseerders en hul vennote, SuperSport, SA Skole Atletiek en Atletiek Suid-Afrika, geen inskrywingsgelde gehef nie. Skole van regoor die land het opgedaag, en merkwaardige talent het van alle uithoeke na vore getree. Die top seuns- en meisieskool van elke provinsie het gekwalifiseer vir die nasionale finaal, waar die beste baan- en veldskole in die land as algehele kampioene gekroon sal word. In totaal sal 18 skole met meer as 500 atlete aan die finaal deelneem. Hoërskool Vryburg se atlete het op Dinsdag, 11 Maart, vir die eerste keer aan hierdie nuwe kompetisie deelgeneem.
Die kompetisie werk op ’n puntestelsel gebaseer op die atleet se posisie, en sluit slegs sekere items in: 100m, 200m, 400m, 800m, 1500m, 4x100m aflos, Sweedse aflos, verspring, gewigstoot en spiesgooi. Die seunsspan van Hoërskool Vryburg het tydens die provinsiale byeenkoms in Maart die algehele eerste plek behaal, en kwalifiseer dus om aan die nasionale finaal in Johannesburg deel te neem. Reeksmedestigter en voormalige Olimpiese naelloper, Mathew Quinn, het gesê: “Ons het die hele land deurkruis, al nege provinsies besoek, en die beste skole in elkeen gekroon. Nou sal al hierdie kampioene op een baan ontmoet, by die UJ-stadion, om te bepaal wie die beste skool in Suid-Afrika is. Ons het nege provinsies op een baan. Laat ons dit uitsorteer.” Die tweedaagse Track en Field-nasionale finaal sal regstreeks op SuperSport Variety 4 uitgesaai word.
