STELLALANDER-GANYESA: Twee verdagtes sou na verwagting in die Ganyesa-landdroshof verskyn op aanklagte van onwettige besit van vuurwapens en ammunisie.
Die verdagtes is in twee afsonderlike voorvalle in die vroeë oggendure van Dinsdag, 23 Desember 2025, in Morokweng-dorp buite Vryburg in hegtenis geneem. Die arrestasies het gevolg op ’n misdaadintelligensie-gedrewe operasie deur lede van die Vryburg K9-eenheid en die Misdaadvoorkomingseenheid. Die een verdagte, ’n 38-jarige man, is in besit gevind van ’n ongelisensieerde pistool en vyf patrone.
Verdere ondersoek het aan die lig gebring dat die vuurwapen aan ’n inwoner van Kokwana-dorp in Morokweng behoort. Die tweede verdagte, ’n 49-jarige man, is ook in hegtenis geneem nadat hy in besit gevind is van ’n ongelisensieerde Norinco-pistool en agt patrone. Voorlopige ondersoek dui daarop dat die wettige eienaar van die vuurwapen reeds oorlede is en ’n inwoner van Pomfret, naby Morokweng, was. Beide vuurwapens en die ammunisie is deur die polisie gekonfiskeer en sal aan ballistiese toetse onderwerp word. Die waarnemende provinsiale polisiekommissaris, majoor-generaal (dr) Ryno Naidoo, het die lede geloof vir hul uitstekende werk en die verwydering van gevaarlike vuurwapens uit die verkeerde hande.
