NOORDWESTER – ZOETMELKSVLEI - Vir baie jare het Alda van der Walt in die gemeenskap van Lichtenburg, en veral by die Vrouelandbou-unie, diep spore getrap. Sy was vir meer as 40 jaar ‘n lid van die VLU, waarvan 21 jaar as voorsitster van die Zoetmelksvleitak. Alda het deur die jare baie toekennings ontvang vir VLU-kompetisies waaraan sy deelgeneem het. Sy is baie veelsydig en het uitgeblink in onder andere handwerk, bak en kuns. Sy het verskeie kere die tak se toekenning vir ‘lid van die jaar’ ontvang. Sy het ook deur die jare haar man, Paul van der Walt, wat self vir baie jare ‘n leierskapsrol in die plaaslike boeregemeenskap vervul het, ondersteun in sy werk.
Misdaad oorsig vanaf SAPS
NOORDWESTER – LICHTENBURG - Kolonel Willem Bekeer sê Lichtenburg SAPD het relatief goed gevaar in die voorkoming van misdaad vir September 2023.
In totaal het aangemelde misdaad met vyf persent gedaal. Meer kommerwekkende misdaad is verkragting wat met vyftig persent toegeneem het, aanranding dertig persent, inbrake by besighede drie en dertig persent, bedrog honderd en vyftig persent en besigheidsroof met vyf en twintig persent.
Bekeer versoek vrouens om asseblief nie alleen in verlate, beboste areas te loop nie.
Oktober is borskankermaand
NOORDWESTER – LICHTENBURG - Borskanker is wêreldwyd die algemeenste kanker by vroue. Een uit elke twaalf vroue loop die risiko om in haar leeftyd borskanker te ontwikkel.
Vroeë opsporing en diagnose van borskanker is lewensbelangrik vir die geslaagde hantering van die siekte. Hoe kleiner die gewas is wanneer dit opgespoor en verwyder word, hoe beter is die kans dat dit nog nie uitgesaai het na ander dele van die liggaam nie. Navorsing het getoon dat gewasse van kleiner as 1,5 cm in deursnit ‘n kleiner kans het om uit te saai en ook minder aggressief is. Daar is verskillende maniere waarop ‘n vrou haarself deur vroeë opsporing kan beskerm.
