Klerksdorp Rekord, Klerksdorp - Dit is ‘n week van feesviering vir oumagrootjie Yda Vosser wat op Woensdag 4 Oktober haar 100ste verjaardag gevier het. Yda woon al 30 jaar in Panoramapark Afreedorp in Klerksdorp en is die dag voor die groot verjaardag mylpaal met koek en tee bederf deur die bestuur, personeel en naaste vriende. Sy is amptelik die oudste inwoner van Panoramapark en almal ken haar.
Tydens die verjaardagviering het sy aangedaan gesê haar boodskap aan geliefdes is om tyd te spandeer aan dit wat ewigheidswaarde het. Yda het deurentyd geskerts en gelag terwyl die bestuur en vriende kort verjaardagwense aan haar gegee het. Een van haar geskenke was ‘n reistas waarop Yda geskerts het dat sy graag oorsee wil gaan. Sy het ook gespot dat sy die dansvloer sal open.
Yda woon sedert 1975 in Klerksdorp en het op 1 November 1993 verhuis na Panoramapark. Haar man is in 2005 oorlede.
Sy het haar verjaardag in Potchefstroom spandeer waar haar kinders, kleinkinders en agterkleinkinders ‘n familie-ete gehou het.
