Klerksdorp Rekord, Klerksdorp - Na die pas afgelope Noordwes Rolbal se Ope Drie spel (trips) was dit weer die spanne van Klerksdorp Rolbalklub (KBC) wat weggestap het met drie van die ses medaljes wat op die spel was.
In die mansafdeling het Johan van der Heever en sy span die goue medalje verower met Blackie Swart en sy span wat die bronsmedalje verower.
In die damesafdeling het Corrie Breintenbach en haar span die bronsmedalje verower.
Johan en sy span het tydens die finaal ‘n sterk span van PCC (Potch) die loef afgesteek met skitterende spel van al drie spanlede.
Corrie en haar span het uitgespeel vir die bronsmedalje teen nog ‘n span van KBC, Carina van der Heever se span, en na ‘n naelbyt stryd het hulle die knoop deurgehak om ‘n medalje te wen.
Blackie en sy span het tydens die uitspeel vir bronsmedalje teen ‘n span van PCC gespeel en na ‘n aanvanklike gesukkel hul “lyne gekry” en ‘n groot agterstand uitgewis en die wedstryd op ‘n drafstap gewen.
Rudi Lombard en Morné Vermeulen is in Johan se span. Marius Koenig en Hentie Buys is in Blackie se span en Lany Olivier en Elaine Laubscher is in Corrie se span.
