BRITS POS – HARTBEESPOORT – In teenstelling met die wetlike beperkings vir inwoners in ‘n beskermde gebied, is vrywillige deelname die oogmerk vir ‘n bewarea om die Magaliesberggebied te beskerm, te herstel en op ‘n volhoubare manier die natuurlike en kultuurerfenis as grondeienaars, gemeenskappe en belanghebbendes te bestuur.
Reeds in 2009 is ‘n bewaringsgebied in die Magaliesbergstreek tot stand gebring. Sedertdien het daar groot veranderings plaasgevind ten opsigte van demografie, grondeise en gewese hoofbedrywe, soos intensiewe groenteproduksie en ander landboubedrywe.
Die fokusverskuiwing oor die laaste dekade was dan ook na die toeristepotensiaal en die ontwikkeling van eko-woonbuurte. Ongelukkig het hierdie dinamika tot gevolg gehad dat bewaring, volhoubare ontwikkeling en die beskerming van biodiversiteit buite duur elektriese heinings en spoggerige huise, verwaarloos geword het.
Om uit die groef van passiewe betrokkenheid te kom en te verseker dat die gemeenskappe in die bewarea die geleentheid kry om deur kennis en deelname te bou aan die toekoms van ‘n unieke- en prentjiemooi gebied, stel die huidige bestuurspan die volgende kerndoelwiite voor:
Beskerm die omgewingsintegriteit van die gebied
Verhoed ontoepaslike grondgebruike en mynaktiwiteite
Ondersteun veilige en volhoubare boerderygebruike
Verhoog gemeenskapsveiligheid en noodreaksies
Kweek bewusmaking en deelname aan oor gemeenskappe heen
Moedig vennootskappe en befondsingsgeleenthede aan
Moniteer vooruitgang en pas aan volgens gemeenskapsterugvoer
Die bekendstelling van hierdie kerndoelwitte oor ‘n uitgestrekte bewaringsgebied, soos gedefinieer in die meegaande kaart, verg dan ook ‘n intensiewe kommunikasieprogram. Die bestuurspan gaan poog om dit suksesvol te maak, deur informele gesprekke en vergaderings met gepaste en entoesiastiese kleiner groepies.
Vir enige navrae, kontak die sameroeper, Kevin Murphy by 082 784 7865, e-pos
