RUSTENBURG HERALD - RUSTENBURG - Die Rustenburg Golden Oldies is eerskomende Saterdag, 30 Augustus, weer op hul pos met hul jaarlikse Golden Oldies Motorskou wat vanjaar weer by Brauhaus Afrika aangebied word.
Kortom behels die Motorskou 'n spoguitstalling van ongeveer 200 motors wat wissel van klassieke versamelaarsrygoed, bietjie jonger maar nogtans nostalgiese immergroen-modelle wat pragtig gerestoureer is, dalk meer byderwetse "muscle cars", sogenaamde Street Rods en dan uiters duur en ikoniese motors wat mense se asems wegslaan.
Maar moenie 'n fout maak nie - daar is ook 'n verskeidenheid trekkers, motor-fietse en statiese enjins - die masjiene wat vroeërjare in Suid-Afrika en trouens wêreldwyd algemeen gebruik is om water te pomp en elektrisiteit op te wek sodat yskaste kan werk en ligte kan brand.
Heerlike etes en allerlei drinkgoedjies kan uit die Brauhaus-kombuis bestel word terwyl die manne tussen die spoggerige rygoed die grond tot fynstof trap en oor toeka se dae gesels.
Vanjaar se Motorskou beloof om 'n groot geleentheid te wees met talle ou- en nuwe motorklubs asook motororganisasies wat verteenwoordig sal wees. Onder dié is daar die Pretoriase Oumotorklub, die Pretoriase Jakaranda VW-klub, die Volvoklub, Lumina-klub van SA, die Centenary Club van Randfontein, Car Collectors Club, Harley Davidson-klub, die manne van die Thunder tour asook die Hoëveldse Veteraan Trekker en Enjinklub met 'n klompie statiese enjins - en van Rustenburg se kant sal die bekende Human Jordaan met 'n paar van sy mooiste enjins 'n blik oor die dae van ouds kom gee.
Vir die jongklomp en die mense wat vinnig verveeld raak sal daar horde stalletjies wat allerlei "foods en goods" verkoop, wees.
'n Biertent met met 'n kunstenaar en voetejeuk-musiek waar die manne 'n bietjie lafenis vir die droë kele kan gaan soek en selfs 'n veilige speelplek vir kinders sal ook beskikbaar wees.
As jy dalk vroeër in jou onbesonnenheid 'n afspraak vir Saterdag, 30 Augustus, gemaak het, moet jy dalk vinnig kanselleer - die Golden Oldies Motorskou kan eenvoudig nie misgeloop word nie.
Die hekke open reeds om 09:00 - sien julle almal daar!
