Klerksdorp Rekord, Klerksdorp - Die masker is af en die ware Petro Kotze-Odendaal is nou vry. Weg is die langhaar meisiekind wat bang is vir haar dronk pa, kwaad is vir haar ma en skaam kry oor hul armoede.
Haar boek, Wanneer die Krieke Stil Word, is pas deur Naledi Uitgewers uitgegee. Sonder doekies omdraai skryf Petro oor haar grootwordjare op die myndorp. Waar sy mens geword het en ook waar sy haar man en die pa van haar seun ontmoet het. Die titel van die boek is juis verleen aan die vreesaanjaende angs wat sy ervaar het as sy in die nag moes vlug voor haar eggenoot wat hoog op dwelms gedreig het om haar dood te maak.
Met hierdie boek, sê Petro, is sy op 51-jarige ouderdom reg om haar duiwels te konfronteer. “Dit was nie ‘n maklike boek om te skryf nie, nog minder vir die mense naaste aan my om dit te lees. Ek moes sekere ervarings vir die eerste keer met my seun deel en dit was vir my ma moeilik om te aanvaar dat ek daaroor skryf,’’ gesels sy.
Die skryfproses het drie jaar gelede begin by ‘n skryfskool wat Stefaans Coetzee aangebied het. Sy was eers vuur en vlam, maar haar moed het haar begewe en die manuskrip is iewers in ‘n laai gebêre.
Onder die aanmoediging van Coetzee wat as haar mentor opgetree het, het sy verlede jaar weer begin skryf en toe is die boek aanvaar. Die eerste boekbekendstelling word op Dinsdag 3 Junie by Shack to Sanctuary gehou, daarna is daar een in Pretoria en op 10 Junie is daar een by die Snowflake in Potchefstroom. Op 12 Junie kan kykers haar op KykNet se Groot Ontbyt te sien kry.
Petro is versigtig optimisties oor die ontvangs van haar boek, veral uit plaaslike geledere. “Ek skryf oor my lewe en my hart. Oor dit wat agter toe deure gebeur het, en mense nie eintlik oor praat nie. Maar ek skryf oor die siekte van ons tyd; molestering, verslawing, woede, armoede. Ek is nogal gespanne oor van die detail, maar ek weet dit wat ek geskryf het, het my vrygemaak om die regte Petro te kan wees, en nie meer agter maskers te skuil nie.’’
Indien jy die boekbekendstelling wil bywoon waar Stefaans Coetzee met Petro gaan gesels, is jy welkom. Toegang is gratis. Die boek sal teen R270 te koop wees. Skakel Monica by Bargain Books by 062 544 3255 om jou plek te bespreek.
Petro is pastoor en stigter van die Voetlig-gemeente op Orkney.
