BONUS - RUSTENBURG - Die Suid-Afrikaanse Onderwys Unie (SAOU) het in 'n mediaverklaring die voorlopige regulasies oor die aanpassings aan die Suid-Afrikaanse Skole Wet (bekend as Bela) deur Minister Siviwe Gwarube verwelkom en is tans besig om aan die ontleding van die voorlopige regulasies te werk.
Die SAOU beoog om die insette wat deur verskillende forums oor die voorlopige regulasies gemaak is te vergelyk, om sodoende volledige terugvoer oor die regulasies te formuleer.
Die SAOU vind dit ook bemoedigend dat die twee kernaspekte "Leerdertoelating tot openbare skole" en die "Norme en standaarde vir die kapasiteit van openbare skole", eerste aangespreek word.
Die SAOU is veral tevrede daarmee dat die hofuitspraak wat in Oktober 2023 deur dié unie verkry is, in terme van die vasstel van die kapasiteit van skole, die voorgeskrewe kriteria in die voorlopige regulasies reflekteer.
"Die deoel van die vasstelling van die norme en standaarde om die kapasiteit van skole te reguleer, is krities noodsaaklik vir kwaliteit-onderrig en leer om plaas te vind. Die SAOU het herhaaldelik die feit betreur dat oorvol skole lei tot die verswakking van die welstand van onderwysers, sowel as die toename in dissiplinêre probleme wat uiteindelik nie in die beste belang van leerders is nie," het die mediaverklaring gelui.
"Dit is, nieteenstaande, nie net die afkondiging van beleid wat die stelsel rig en lei nie. Die SAOU sal toegespits waak op die proses van implementering van die regulasies om te verseker dat provinsiale- en distriksamptenare aan hierdie riglyne gehoor gee. "Dit is egter ontstellend dat hierdie voor-lopige regulasies vir openbare kommentaar uitgereik is, nadat die toelatingsprosesse in onderskeie provinsies reeds onderneem is en dat hierdie regulasies eers in die 2027 toelatingsiklus geïmplementeer sal kan word. Die SAOU sal formeel insette op die voorlopige regulasies op ‘n latere stadium lewer."
