Klerksdorp Rekord, Klerksdorp - Murika Rossouw is Hoërskool Schoonspruit se top matrikulant vir 2025.
Sy spog met ses onderskeidngs in Wiskunde, Rekeningkunde, Inligtingstegnologie, Engels, Afrikaans en LO. Sy het Rekenaartoepassingstegnologie as ‘n sewende vak gehad.
Syfers is haar kos en sy is ingeskryf om vir ‘n rekenmeester aan die NWU in Potchefstroom te studeer. Sy gaan in ‘n woonstel bly en verhuis vandeesweek na die studentestad.
Sy beskryf haar onderwysers wat haar deur haar skoolloopbaan bygestaan het, as die hoogtepunt van haar skoolloopbaan. “My gunstelingvak was Rekeningkunde en ek het nie van Afrikaans gehou nie. Ek weet nie eintlik hoekom nie. Wiskunde was ‘n riller en ek is baie trots op my simbool vir Wiskunde,” vertel sy.
Sy het twee ouer sussies: een is ‘n boekhouer en die ander een is besig met ‘n “gap”-jaar om te besluit wat sy wil word. Sy het geen leierskapposisies beklee nie en het volgens haar “net die hele jaar studeer”. Sy het darem tyd gekry vir stokperdjies soos lees en teken. “Ek sien myself oor tien jaar as ‘n rekenmeester met my eie praktyk,” sê sy trots.
