NOORDWESTER – LICHTENBURG - Agri NW is van meet af betrokke by die Meladora -hofsaak en het 4 Augustus met gemengde gevoelens kennis geneem van die uitspraak wat deur die Grondwetlike Hof gelewer is.
Hiermee ‘n basiese opsomming van die beslissing, met goedkeuring van Moolman & Pienaar Ingelyf, wat die saak aangevoer het:
Die aanhou van vee is nie ‘n outomatiese reg waarop werkers, bewoners of huurders kan aanspraak maak nie.
Sodra toestemming verleen word om vee aan te hou, word dit reg, ‘n reg wat onder die Wet op die Uitbreiding van Sekerheid van Verblyfreg (WUSV) beskerm word. Let daarop dat toestemming stilswyend kan ontstaan as daar nie opgetree word teen persone wat sonder toestemming begin om vee op ‘n plaas aan te hou nie. Sodra die reg om vee aan te hou, ‘n WUSV-reg word op grond van uitdruklike en/of stilswyende toestemming soos hierbo, sal die eienaar só ‘n reg moet kanselleer ooreenkomstig Artikel 8 van WUSV en eers dan, en by nakoming van die vereistes in regstappe, kan gevra word vir verwydering van die vee. Die hof het nie beslis dat die aanhou van vee nie ‘n outomatiese reg is nie, maar kommerwekkend bevind dat die deur oop is vir iemand om in die toekoms só aan te voer. Dit is nou geweier omdat die argument vir die eerste keer in die Grondwetlike hof geopper was. Dit beteken nie dat so punt in die toekoms sal slaag nie, maar dit laat steeds risiko en regsonsekerheid oor die kwessie. Agri NW het reeds aan al sy lede voorstelle gekommunikeer hoe om die toegewing van vee-aanhouding in die toekoms, maar ook terugwerkend te hanteer. Dit is kommerwekkend dat daar ‘n toenemende poging is om die regte van grondeienaars te bevraagteken tot voordeel van ander. Dit is ook duidelik dat ‘n groter span van lede, vennote en ondersteuners nodig sal wees om hierdie verskerpte aanslag af te weer.
