NOORDWESTER - LICHTENBURG - Johan Kruger is ‘n dosent aan ‘n Suid Afrikaanse Universiteit en ‘n Midde Oosterse besigheidskool.
Na sy studies in Potchefstroom het hy gewerk as joernalis by Die Burger en later by die ou SAUK. Sy korporatiewe loopbaan maak ook ‘n draai in mynbou. Hy het verskeie ander belangstellings waarvan die skryf van kortverhale en stories vertel een is.
Omdat Lichtenburg so prominente plek in sy lewe het, begin hy kortverhale skryf en skep ‘n karakter, Oom Lodewikus. Oom Lodewikus is nie slim nie, maar hy luister goed. Hy onthou baie en dan vertel hy stories wat hy in sy besige lewe ervaar het. Die stories is verweef uit Lichtenburg se kinderjare, sy werksreise en lewenservaringe. Soms is die stories waar, soms is daar ‘n stertjie by en moet die leser self besluit wat waar is en wat nie. Tog kan alles in die konteks van Lichtenburg geplaas word.
En nou het Lichtenburgers die kans om hierdie stories te lees, te ervaar en te onthou. Nostalgie, trane en heerlik uitbundig lag wag op die leser.
Die bundel geskryf deur Johan Kruger, “Wonderwêreld van Oom Lodewikus” is ‘n heerlike geskenk en ‘n aan my, van my boek. Miskien herken jy die karakters of dalk jouself in die boek.
Die verhaal vertel van die beste tyd in Johannes Lodewikus (Hannie) se lewe in Lichtenburg. Hier het hy skool gegaan tot in matriek (1960’s) en is daarna universiteit toe. Hy het bande behou met die dorp totdat sy ouers oorlede is in die middel negentigs. Sy lewe draai steeds om dié tyd - sy vriend Bokkie wat die Noord-wester afgelewer het en Mnr Rabe, die oud-redakteur, wat baie streng was. Al Debbo, Charles Jacoby, die Alabama en selfs die Weense Seunskoor het hier opgetree. Kinders uit die Duitse klas het as tolke opgetree.
Sy pa het sy bande by oom Jerry Cohen van Mieliebelt Motors gekry, in ruil vir herstelwerk by sy huis. Koeie is in agterplase gemelk en die liters melk en botter wat gegenereer is, is weggegee of vir ‘n appel en ‘n ei verkoop. Leë koeldrankbottels was ‘n geldeenheid want twee van hulle kon ‘n sjokolade koop, en vier en ‘n bietjie was die prys van ‘n fliekkaartjie. Dit was ‘n maklike en interessante lewe.
Kontak Johan Kruger op 076 958 7279 om die boek te kry, of bestel jou kopie deur “Wonderwêreld van Oom Lodewikus” te Gooogle, wat jou na Groep7 Drukkers se webtuiste sal neem om die boek te bestel.
