NOORDWESTER - COLIGNY - Hier aan die einde van Vrouemaand wil Die Noordwester ‘n laaste kyk gee aan twee van ons mees veelsydige vroue in die gemeenskap. Bets Erasmus is beslis ‘n vrou om van naderby te leer ken. Haar nege gepubliseerde boeke, wat koffietafelboeke en digbundels insluit, is ‘n pakket propvol stories van mense wat oor haar pad gestuur is - meestal afvlerk-mense, wat haar deur geloof, wat bitter belangrik is vir haar, tot groot hoogtes geïnspireer het.
Dit is fassinerende boeke en op 84 jarige ouderdom, het sy onlangs haar nuutste en merkwaardige bundel, “Sonsimfonie” (uitgegee deur Kreativ SA) gepubliseer. Sy het lank nog nie klaar geskryf nie en haar kinders, kleinkinders en agterkleinkinders sien haar tussendeur haar baie reise. Sy vind haar inspirasie ook in die natuur - waarvoor sy baie lief is - en daarom wil sy eendag onthou word as die RARA AVIS voëltjie/mens. ‘n “Free spirit”, ‘n vreemde voëltjie, bietjie mal, dan weer stil en ernstig. Bets woon tans in Kosmos-behuisingsorg in Coligny waar sy almal op hulle tone hou. Sy sien uit daarna om nog vele drome na te jaag.
Henriët en Pieter van Loggerenberg van Coligny het egter geen bekendstelling nodig nie. Saam het hulle al verskeie digbundels die lig laat sien. Albei is afgetree en sê hulle het nou behoorlik tyd om te dig dat die penne klap - en dit is heerlik.
* “Sonsimfonie” is besonders en tans beskikbaar by die uitgewer.
