STELLALANDER-VRYBURG: JP Nel van die plaas Enkelbos in die Vryburg-omgewing het op Saterdag, 26 Julie, die kollig gesteel tydens die Lamb Champs-kompetisie wat deur Saai op Loftus Versfeld in Pretoria aangebied is.
Hierdie nasionale vleiskarkas-kompetisie het vanjaar 102 boere van regoor die land gelok, van sover as die Karoo, Vrystaat en Arlington, wat hul lammers ingestuur het om gekeur te word. Dit was JP se eerste deelname aan die kompetisie en met een van sy Dorperlammers het hy nie net teen groot mededinging uitgestaan nie, maar ook as algehele wenner weggestap. Dié prestasie is des te meer indrukwekkend omdat Merinos en Ill de France tradisioneel as die gunsteling wenras beskou word. Tydens die kompetisie is alle lammers op dieselfde manier gespitbraai, sonder enige speserye, waarna die beoordelaars die karkasse geëvalueer het op grond van vleistekstuur, vetpersentasie, reuk en smaak. Die top-20 lammers is gekeur, waarna die drie beste aangewys is. JP se Dorperlam het uitgestyg bo die res. Meer as 7 000 mense het die feesdag bygewoon, waar daar ook stalletjies en vermaak was. JP het nie net die gesogte titel as Lamb Champ-kampioen ingepalm nie, maar ook ’n stewige kontantprys ontvang. JP, wat saam met sy vrou Melinda en skoonpa Tjaart Steyn op Enkelbos boer, bedryf ‘n gemengde boerdery. Tjaart, wat destyds met die Dorpers begin het, bestuur die beesafdeling, terwyl JP die skaapboerdery behartig. Weens vorig droogtes, boer hulle tans intensief met ongeveer 50 ooie en het vanjaar vir die eerste keer lamhokkies op die plaas ingebring. JP sê hulle gaan nou die Dorperboerdery uitbrei. “Ons gee baie persoonlike aandag aan ons skape, deur soggens en saans te kyk hoe dit met hulle gaan. Só kan ons vinnig enige probleme optel,” sê JP. “Ons is eintlik maar ’n kleinboerdery, en dit wys net dat ons met ‘n grootboerdery ook kan kompeteer. Moet nooit jouself onderskat nie.” Hy beskryf die Dorper as ’n aanpasbare, geharde ras wat goed presteer in die strawwe toestande van die Vryburg-omgewing. “Hulle het goeie moederinstinkte, wat ons laat lam in die winter en hul karkasse se gewig en vetpersentasie is uitstekend. Dis ’n ware vleisskaap.” Hoewel Vryburg as die ‘Texas van Suid-Afrika’ bekendstaan vir beesboerdery, glo JP dat dié prestasie bewys dat die streek ook uitstekende skaapvleis kan lewer. “Ons eet self ons eie skape en het nooit besef ons sit met wenners nie,” sê hy trots. As Lamb Champ-wenner sal JP in Oktober vanjaar meeding teen die ander streekwenners van die jaar. Hy bedank alle borge van die kompetisie en sê hy is dankbaar vir die platform wat aan boere gebied word om hulle produkte direk aan die verbruiker te bemark. “Die liefde vir jou boerdery en die aandag wat jy gee, maak die verskil,” sluit hy af.
