Klerksdorp Midweek, Hartbeesfontein - Maritha Coetzee, DA-raads-lid vir Hartbeesfontein, het op Woensdag 21 Mei van Hartbeesfontein tot by die burgersentrum in Klerksdorp binne ‘n paar ure gestap! Terwyl sy asem geskep het na die staptog het sy vir Klerksdorp Midweek gesê dit was die moeite werd om die kollig te plaas op swak dienslewering van die Matlosana Munisipaliteit op Hartbeesfontein. “Dit was eintlik glad nie so erg nie. Mense het my banggepraat, maar ek het dit gemaak. Dit was 30 km ver.” Sy het ‘n memorandum aan die burgemeester oorhandig waar sy vra vir optrede oor donker straatligte en grondpaaie op die dorp wat volgens haar ‘n groot probleem is. Van haar familie en vriende het haar vergesel op die roete om seker te maak sy is veilig.

Klerksdorp Midweek, Klerksdorp – Die stad se Toekafees vind die naweek plaas met heelwat vermaak uit toeka se dae wat oud en jonk sal besig hou. Die Triestsentrum bied die Toekafees op Saterdag 31 Mei op hul terrein aan en nooi Klerksdorpers om die fondsinsamelingsgeleentheid te ondersteun. Die Toekafees beloof om jou terug in tyd te neem. Verwag ossewaens, trek-osse, sien hoe melk gekarring word en hoe botter gemaak word, asook boerseep en vetkerse.