Stephan Becker, ‘n boer van die Upington-omgewing, is verlede week tydens die Agri Noord-Kaapkongres as die 2025 Noord-Kaap Jongboer van die Jaar aangewys.
As Noord-Kaap Jongboer is hy nou een van die fina- liste om aan Agri SA se Jongboer van die Jaar-kompetisie deel te neem. Al nege provinsies se wen-boere ding hier teen mekaar mee om as algehele wenner aangewys te word.
Stephan is lid van die Koupan Landbouvereniging in die ORLU-streek. Die president van die Oranjerivier Landbou Unie, mnr. Wilco Fourie, sê hulle is baie trots op Stephan wat met sy baie insiggewende voorlegging die kompetisie aangepak het. Met sy herlewingsboerdery styl, probeer hy dinge reg doen. Die Noord-Kaap met sy geharde toestande het sy unieke uitdagings en daarom is ons trots daarop dat hy as wenner uit die Oranjeri-vierstreek aangewys is.
“Van ORLU se kant af, wens ons hom baie sterkte toe met die nasionale kompetisie, waar die nege finaliste teen mekaar gaan deelneem. Ons vertrou dat hy bo gaan uitkom,” aldus Wilco.
Stephan het in ‘n boerdery-familie grootgeword, hy is die tweede generasie Becker op Smalhoek, in die Koupan-omgewing. Dit is so 110 km van Upington af.
Stephan het na skool aan die Grootfontein Landbou Kollege sy diploma in Landbou verwerf en daarna het hy aan die Sentrale Universiteit van Tegnologie in Bloemfontein sy graad verwerf.
In 2014 het hy te- ruggekom plaas toe en begin boer. Hy en sy pa, Koos, boer eintlik saam, maar hy bestuur Smalhoek op sy eie.
Nadat hy getroud is en al ‘n tydjie geboer het, het hy begin met sy meestersgraad. Hy het ‘n M-graad in Landbou wat spesialiseer in skaap fenotipe. In kort is dit hoe die voorkoms van skaap ‘n invloed het op hul produksie.
Op Smalhoek pas hy al die afgelope ses jaar bewaringslandbou toe. Hy sê hy het sommer begin met bewaringslandbou toe hy Smalhoek op sy eie begin bestuur het. Die stelsel wat hy volg is gegrond op dr. Louis Du Pisani se wisselweidingstelsel. Daarby het hy herlewingslandbou geintigreer. By herlewingslandbou fokus ‘n mens hoofsaaklik om die grondbioom te verbeter. Dis noodsaaklik om diere te intigreer in daardie sisteem. Hy sê herle- wingslandbou het twee bene, jy voed die grond en dit kan net moontlik wees deur veebestuur.
Die Jongboer van die Jaar-kompetisie is ‘n jaarlikse kompetisie wat deur Agri SA gedryf word. Stephan sê jy moet ‘n passie vir boerdery hê, asook’n passie vir Landbou in Suid-Afrika, dan kan jy ‘n jongboer wees.
Die Agri SA Jongboer-kompetisie gooi ‘n breë net vir alle soorte boere om deel te neem - vanaf besproeiingsboere, saaiboere tot veeboere.
Stephan sê hy het die kompetisie baie geniet. By die beoordelingsfase is daar ‘n breë spektrum kriteria waarin jy moet goed wees, byvoorbeeld diereproduksie, personeel bestuur en finasiële bestuur en meer. Hy sê hy moes ‘n 20 bladsye vraelys invul om te kon deelneem.
“Om ‘n suksesvolle boer te wees, moet jy verskillende aspekte van jou boerdery kan integreer en ‘n goeie storieverteller wees, met ander woorde, jy moet jouself bemark.
“En daarmee saam, moet jy weet wie jou Skepper is en weet waar jou krag en genade vandaan kom,” sluit Stephan af.
Hy is getroud met Estelle en hulle het drie kinders. Hy is die seun van Koos en Vini Becker.
