GEMSBOK-UPINGTON: Die APD Benede Oranje het onlangs ‘n baie geslaagde Vrouedag by die Protea Inn Hotel aangebied, as hul viering van Vrouemaand.
Die tema was, “Kom ons vier haar onbeskryflike en uitmuntende krag.” Die dames wat die oggend bygewoon het was almal geklee in skakerings van pienk en het heerlik saamgekuier, geluister en deelgeneem aan die interessante program wat aangebied is.
Die spesiale geleentheid is gereël om dames met gestremdhede, mamas met kinders met gestremdhede en versorgers van persone met gestremdhede te vier. Dit was ‘n geleenheid waar hulle net kon inskakel by ander dames en die dag ontspan en geniet.
Die dag is deur Berenice Bauman en Elmarie Hoft gereël, met ondersteuningde hulp van die res van die personeel en werkswinkellede.
Verskeie gassprekers het daarna opgetree. Jameela Sha van Strongwomen het gesels oor die dienste wat die organisasie verskaf. Daarna het Eldine Gous van die APD, ‘n gedig, “Haar krag sigbaar en onsigbaar,” geskryf deur Neil Deon Titus, voorgelees.
Elizabeth Folorunsho het die gehoor laat skater van die lag met haar praatjie oor die bemagtiging van vroue.
Marissa Serfontein, ‘n musikant van formaat, het gedurende die oggend baie mooi “songs” gesing en almal het saamgeklap en gesing. Marissa bied gereeld musiekklasse vir die APD werkswinkellede aan en dan word daar geleer hoe om musiek te maak.
Monica Gerhard en Landa Conradie, albei persone met gestremdhede, het hul lewensreis met die dames gedeel en hoe hul hul onafhanklikheid bereik het.
Die dames het ook, onder leiding van Mary-Ann Kella, hul eie armbande gemaak. Dit het gesorg vir groot opgewondenheid en wissel- werking - én hulp - tussen die dames.
Dr. Jacomien Botes het die oggendprogram afgesluit met selfsorg tegnieke. Die dames het geleer hoe om behoorlik te ontspan en hoe belangrik goeie ontspanning is sodat die lewe nie met jou weg hardloop nie.
Daarna het die gaste gesellig verder gaan kuier met ‘n heerlike middagete in die hotel se restaurant.
