Na afloop van al die skietproewe is Zanru Broodryk en Dine Joubert gekies om aan die British Junior International Competition in Bisley, Verenigde Koninkryk, deel te neem.
Dit was ’n wonderlike ervaring vir die twee Veltie-skuts.
In die eerste week het hulle Londen verken en talle besienswaardighede besoek.
In die tweede week het die kompetisie in Bisley begin, waar hulle uiteindelik kragte kon meet teen skuts van ander lande.
Dine het deelgeneem in die o.21-pistoolafdeling.
Sy het aan die 25 m-sportskiet deelgeneem (’n dissipline wat nie in Suid-Afrika aangebied word nie).
Sy het haar telling van 2022 met 57 punte verbeter en ’n 6de plek behaal.
Sy het ook aan die 10 m-presisie en 10 m-Grand Prix deelgeneem.
In eersgenoemde het sy ’n 14de plek algeheel behaal.
Zanru het deelgeneem in die o.21-sporterafdeling.
Op dag 1 het hy aan Target Sprint deelgeneem, waar deelnemers drie keer 400 m hardloop en daarna valplate moet skiet.
Dit was Zanru se eerste keer in hierdie dissipline.
Sy span van drie skuts het daarin geslaag om ’n silwer spanmedalje in die gemengde spanafdeling te wen.
Hy het ook aan die 3-posisie (staan, kniel en lê) en die 10 m-staan deelgeneem. In die 3-posisie het hy en sy span ’n brons medalje ontvang in die gemengde spanafdeling.
“Dit was die ervaring van ’n leeftyd, en ons is uiters trots op die twee Veltie-skuts. Om jou land oorsee te verteenwoordig, bly ’n besondere en noemenswaardige prestasie” skryf die Hoërskool Duineveld.
