GEMSBOK-UPINGTON: Die ZF Mgcawu Distriksmunisipaliteit, saam met sy vyf plaaslike munisipaliteite (Kai !Garib, Dawid Kruiper, Tsantsabane, Kgatelopele en !Kheis Plaaslike Munisipaliteite), het voor die Suid-Afrikaanse Menseregtekommissie (MRK) verskyn as deel van die Kommissie se provinsiale ondersoek na die stand van dienslewering in die Noord-Kaap.
Die ondersoek het gefokus op kritieke menseregtekwessies met betrekking tot watervoorsiening, sanitasie, munisipale bestuur en die breër uitdagings wat dienslewering beïnvloed. Die Kommissie het opgemerk dat die ondersoek gevolg het op talle klagtes wat deur gemeenskappe regoor die provinsie ingedien is rakende toegang tot basiese munisipale dienste. Die Munisipale Bestuurder van die ZF Mgcawu Distriksmunisipaliteit, mev. Samantha Tatas-Titus, het die afvaardiging gelei, ondersteun deur senior bestuur.
Die Munisipale Bestuurder het opgemerk dat munisipaliteite onder ernstige finansiële druk verkeer, met ‘n tekort aan tegniese en gespe- sialiseerde vaardighede en verouderende infrastruktuur wat groot beleggings vereis. Hierdie uitdagings word verder vererger deur historiese strukturele ondoeltreffendhede, insluitend opgeblase personeelkomponente, sowel as beperkte projekbestuurskapasiteit wat nodig is om diens- leweringsverbeterings te implementeer en te volhou. Elk van die vyf plaaslike munisipaliteite het sistemiese hindernisse uiteengesit wat diens- lewering in hul onderskeie gebiede beïnvloed, insluitend watergehalteprobleme, onderbrekings in die voorsiening, agterstande in onderhoud en infrastruktuurtekorte.
Die ZF Mgcawu Distriksmunisipaliteit het die sessie afgesluit deur die ondersteuning wat tans aan plaaslike munisipaliteite verskaf word in ooreenstemming met sy grondwetlike mandaat uiteen te sit. Hierdie ondersteuning sluit in tegniese adviesbystand, die koördinering van rampbestuur en infrastruktuurbeplanning en die fasilitering van interregeringsverhoudinge om belyning tussen regeringsfere te verbeter, en kapasiteitsbou ondersteuning waar hulpbronne dit toelaat.
Mev. Tatas-Titus het beklemtoon dat hoewel die uitdagings ernstig en diepgewortel is, hulle nie oornag opgelos kan word nie, maar same- werkende bestuur, voorspelbare befondsing en versterkte institusionele kapasiteit vereis.
Die Kommissie het die Distriksmunisipaliteit se openhartige en eerlike betrokkenheid erken en verwelkom, en opgemerk dat verantwoordbaarheid, deursigtigheid en eerlike verslagdoening van kritieke belang is om die publiek se vertroue in plaaslike regering te herstel.
Die Munisipale Bestuurder het haar waar- dering teenoor die Kommissie uitgespreek vir die aanspreeklikheid van munisipaliteite en die Distrik se verbintenis tot die verbetering van diensleweringsuitkomste met dringendheid, realisme en meetbare aksies herbevestig.
** Volledige onderhoude met munisipale bestuurders en rolspelers van plaaslike, sowel as distriskmunisipaliteite kan op die MRK youtube kanaal gesien word.
https://www.youtube.com/watch?v=QBIh4jz8oLA
Hou die Gemsbok dop vir meer oor die Menseregte Kommissie se ondersoek na munisipale dienslewering in die Noord-Kaap
