GEMSBOK-UPINGTON: Cupcakes 4 kids with Cancer is ‘n projek wat geld insamel vir kinders met kanker.
 Dit is weer vanjaar deur Mariza Viljoen georganiseer met die hulp an Toks Bosman van die Kalahari Mall.
Van Saterdag vroegoggend af, is kolwyntjies by die stalletjie by Ingang 2 van die Kalahari Mall verkoop.  Hierdie is ‘n nasionale projek en is baie goed deur die publiek ondersteun.”
 Verskeie dames het Mariza gehelp om die kolwyntjies te bak. Daar is sowat 1 000 kolwyntjies verkoop. Baie mense het ook kontant skenkings gegee.
‘n Spesiale dankie aan die Uppies Verbruikers klasse wat 300 Cupcakes gebak het met juf. Charlene Olivier wat hierdie projek by die skool bemark het, asook Lana van der Westhuizen wat 275 gebak het.
Die ATKV Rooiduin-tak het van die Cupcakes geskenk en die Gordonia Lionas, asook Rotary Anns het kontantskenkings gedoen.

GEMSBOK-KEIMOES: Die geraas, wetteloosheid en ernstige veiligheidsrisiko’s wat gedurende naweke by die Keimoes Hotel plaasvind is nou op ’n punt waar dringende ingryping nodig is ter wille van die gemeenskap.
 AfriForum se Keimoes-tak, ondernemings en gemeenskapslede in die omgewing van die Keimoes Hotel in Hoofstraat het nou ’n formele klag en versoek om dringende ingryping aan die !Kai !Garib Plaaslike Munisipaliteit en ander betrokke owerhede gerig. 

Premier Dr. Zamani Saul, vergesel deur lede van die Uitvoerende Raad, lede van die Provinsiale Wetgewer, en burgemeester en speaker van die Dawid Kruiper Plaaslike Munisipaliteit, het die Een Miljoen Bome-veldtog amptelik by die Sandile Present-biblioteek in Upington bekendgestel.
Onder hierdie inisiatief sal ‘n totale teiken van 115 000 plante regdeur die Noord-Kaap-provinsie geplant word - om die nasionale teiken van 1 miljoen te bereik - om klimaatsverandering-uitdagings te versag.

GEMSBOK-KANONEILAND: Op Saterdag, 20 September 2025 het ATKV Rooiduin-tak tesame met African Vineyard, die 100 ste bestaansjaar van Afrikaans gevier.  Die geleentheid is in ‘n warm atmosfeer aangebied waar kultuur, musiek, taal en kuns hande gevat het.
Na ‘n fantastiese voorgereg met pons, verskeie brode en patees in die skilderysaal, is die hoofgereg in Afrikaanse tradisie aangebied, in die vorm van ‘n langtafel, in die tuin met ‘n egte
 Boerekos spyskaart soos onder andere skaapstertjies, pampoenkoekies, beespastei, beet, bone en vele meer. 

GEMSBOK-UPINGTON: Vanaf 7 - 9 Oktober word ‘n volwaardige kunsteweek in Van Zylsrus gehou. Dit gaan ‘n week wees van skilder, beeldhouwerk, skryf, storie vertel en nog vele meer.
As voorloop tot die week, is ‘n span besig om ‘n aasvoël geoglief (tekening op land) te skep.
Die groot landkuns-aasvoël, wat die broer-en-susterspan, PC Janse van Rensburg en Anni Snyman gaan bestuur, het intussen ook vlerke gekry. PC en Anni het Van Zylsrus besoek en hulle kon ‘n belangrike fase van hulle beplanning vir hierdie enorme geo- glief (tekening op die land) doen. 
Trollope Mining Mokala Manganese het na vore getree en die twee enorme mangaanklippe geskenk wat nodig is vir die oog en die kloue van die aasvoël. 

GEMSBOK-CALVINIA: Die Noordwester-koerant se stem in Calvinia en die Hantam gaan ná meer as ‘n eeu nie meer gehoor word nie.
Dit is hartseer om te verneem dat die koerant, wat in 1917 gestig is en vir 108 jaar deel was van die hartklop van Calvinia en omliggende dorpe, sy deure gaan sluit. 
Die laaste uitgawe is 26 September 2025.
Onder die toegewyde leiding van mnr. Frans Hugo die eienaar en redakteur wat reeds 93 is, en sy ewe lojale eggenote mev. Maxie Hugo (82) het die Noordwester vir jare nie net nuus verskaf nie, maar ook die mense van die Hantam en omliggende gebiede met mekaar verbind.

GEMSBOK-KURUMAN: Met die steun van ‘n plaaslike ondernemingsontwikkelingsprogram, het die Kuruman-entrepreneur Bontle Lehula, haar gastehuis- en restaurantbesigheid uitgebrei en versterk. 
As een van 17 entrepreneurs wat van die opleidingsprogram deurloop het, het Bontle die kennis, hulpbronne en selfvertroue opgedoen om haar besigheid te laat groei en haar gemeenskap beter te dien.
Bontle het die behoefte aan gemaklike, skoon en bekostigbare akkommodasie in haar dorp erken en haar besigheid, “Back to the Moon”, gestig om beide reisigers en plaaslike inwoners te akkommodeer.
Die program, wat deur REISA befonds en deur RAIZCORP geïmplementeer is, het Bontle en ander begunstigdes omvattende ondersteuning gebied, soos sakeleiding, entrepreneurskapoplei- ding, spesialis advies, marktoegang en administratiewe ondersteuning. 

“Toerisme en Volhoubare Transformasie”? GEMSBOK-WITSAND: Die LUR van Finansies, Ekonomiese Ontwikkeling en Toerisme,  me. Venues Blennies-Magage, het verlede week Toerismemaand by die Witsand Natuurreservaat bekend gestel.
In haar toespraak het sy gesê die Noord-Kaap is nie net ‘n bestemming nie—dis ‘n gevoel. ‘n Plek waar vreugde gevind word in die warmte van ons mense, die majesteit van ons landskappe en die onvergeetlike oomblikke wat deur elke reisiger se lens vasgevang word. 
Tydens die opening verlede week is ‘n vierwielmotorfiets-avontuur by die Witsand Natuurreservaat bekendgestel, wat bydra tot die Noord-Kaap se portefeulje van aktiewe toerisme. Witsand is ‘n poort na die Kalahari, Namakwa, Karoo en Diamantvelde – en bied gesinsvriendelike aktiwiteite, skilderagtige piekniekplekke en diverse akkommodasie.

GEMSBOK-UPINGTON: Boubeheer is daartoe verbind om die publiek te help om seker te maak dat wat jy koop in orde is, goedgekeurde bouplanne het en voldoen aan die korrekte grondgebruiksregulasies. 
Mnr. Patarick Williams, DKM woordvoerder, gee raad oor die belangrikheid van korrekte bouplanne, indien u ‘n huis wil koop.
“Ons bied ook advies oor watter toekomstige ontwikkelings moontlik is binne die raamwerk van die SPLUMA-regulasies, om te verseker dat jy nie ‘n eiendom koop waar toekomstige ontwikkelingsregte nie goedgekeur kan word nie as gevolg van grondgebruiksbeperkings.

Dit is Septembermaand – dit is lente en Erfenismaand in Suid-Afrika. Ongeag waar jy jou vandag bevind, is ons wortels geplant in die Afrika-bodem. Vir Erfe- nismaand kyk ons met ’n vergrootglas na ons erfenis en hoe ons dit kan lewendig hou. Die !Omama Inheemse Nama Kultuurskool het verlede week die Kalahari Oranje Museum op Upington besoek en meer van die dorp se geskiedenis geleer.  Die HAT definieer erfenis as nalatenskap. Jou erfenis is dus iets wat jy in jou dra, wat jy gekry het en waar jy vandaan kom. Een van die maniere om daagliks jou erfenis te lééf, is deur jou taal daagliks te praat en bevorder. Dit is ook belangrik om dit vir jou kinders te leer, soos daar ook by die skooltjie gedoen word. Die kleuters leer daar die Nama-taal aan. Op die foto staan Maggie Aly, hoof van die !Omama Inheemse Nama Kultuurskool trots in haar tradisionele rok saam met Merlin van Wyk en Elsa Jones van Rhyn, redakteur van die Gemsbok. Merlin is be-kend daarvoor dat  sy kleurvolle kultuurrokke maak. Sy het die rok gemaak wat Maggie aan Elsa geskenk het vir haar jare lange ondersteuning vir hul projekte.

Op 12 September 2025 gaan die sportgronde van Upington Kollege omskep word in ’n sentrum van hoop en gesondheid. Die ZF Mgcawu-distrik, in samewerking met die Departement van Gesondheid, die Departement van Onderwys, en die gemeenskapsorganisasie CRC Cares, bied ’n omvattende Vroeë Kinderontwikkeling (ECD) Gesondheidsdag aan.
Die fokus? Om kinders ’n sterker, gesonder toekoms te gee.
Hierdie dag sluit inentings, ontwurming, tandheelkundige sifting en voedingsondersoeke in. Dit is meer as net ’n gesondheidsprojek – dit is ’n belegging in die lewens van die jongste lede van ons gemeenskap.

GEMSBOK-UPINGTON: Die SAPD in die Noord-Kaap het verlede week ‘n  dringende versoek aan die publiek gerig om honde aan die K9-eenheid te skenk, om die kapasiteit te verhoog en dienslewering te verbeter.
*Die volgende honde kan aan die SAPD geskenk word:
*Border Collies               *Rottweilers
*Duitse Herdershonde
*Hollandse Herdershonde
*Labradors                 *Bloedhonde
*Malinois (Belgiese Herdershonde).
*Vereistes: *Honde kan tussen 18 maande en 5 jaar oud wees.