GEMSBOK-UPINGTON: Vir die volgende twee maande kan alle kunsliefhebbers gaan kyk na Carina Schneider en vriende se kunsuitstalling by die Kanoniki Padstal op Kanoneiland.
Die kunstenaars, wie almal skilderye uitstal, het verlede week ‘n baie geslaagde openingsaand by Kanoniki gehou. Joa Bekker, Thea en hul span, het almal ontvang en heerlike eetgoed en wyn bedien.
Pragtige agtergrond musiek is gemaak deur die Musiek Trio, Jan, Narika en Kristien. Hul musiek het die aand spesiaal gemaak.
Carina het almal verwelkom en die kunstenaars, Hanlie van Staden, Jan Taute, Esté Strauss, Doritha van der Merwe, Carina Nel en Joanita Heydenrich. Carina het genoem dat elke kunstenaar hul eie styl het en die gaste gevra om daarna op te let.”Kyk gerus fyn wanneer julle deur die gallery stap.”  Sy het genoem dat kuns met ‘n mens praat, sonder woorde. 

Vanjaar op 29 – 31 Mei hou ons weer lekker Skou. Die Upington Landbou Expo is sinoniem met lekker kuier, lekker eet en natuurlik  ‘memories’ maak. Ek het soveel stories uit my verlede wat begin met “onthou jy daai keer by die skou”. 
Graag wil ek jou uitnooi na die Upington Landbou Expo van 2025, ons as komitee het baie hard gewerk om soveel “lekker” as moontlik in plek te sit sodat jy nuwe ‘memories’ kan maak.  
‘n Splinternuwe Plaaswerf gaan die jong klomp lank besig hou, daar is ‘n nuwe kuier area op die hoof arena, die pretpark bring alles wat hulle het, en dan ook gaan die Arabierperde ons vermaak vir 3 dae lank.

GEMSBOK-UPINGTON: Chris van der Westhuizen, bekend vir sy Biltongboer Liedjies”, het ‘n konsert by Oranjehof Tehuis vir Bejaardes kom hou.
Chris is oorspronklik van hierdie wêreld en het hier verbygekom, terug huis toe in Roodepoort, na 'n karavaanvakansie aan die Weskus. Sedert sy aftrede in 2022 is hy baie bedrywig met die skryf en opneem van liedjies, waarvan heelwat toonsettings van ou Afrikaanse gedigte is, maar ook sy eie skeppings. Gaan kyk op sy Facebookblad "Biltongboer Liedjies" om meer van hom te lees. 
Chris het ook ‘n paar dae terug, by die ouetehuis op Pofadder konsert gehou.

GEMSBOK-RIETFONTEIN: Die Rietfonteingemeenskap het onlangs gasheer gespeel vir die heel eerste Kalahari and Upington Farmers Association (KUFA) boeredag. 
 Meer as 400 mense vanuit die Kalahari-Upington streek en sover as Namakwaland het op díe dag byeen getrek om behoorlik fees te vier.
Een van die doelwitte van KUFA was om ‘n boeredag vir sy lede en die breë boeregemeenskap aan te bied.

"Ons Verenigende Gereformeerde Kerk in Upington het Sondagoggend 'n wonderlike samekoms in die kerk gehad waar ons die Here met lofsang en eer geprys het tydens die bekendma-king en amptelike onthulling van ons kerk se 150ste bestaansjaarbanier", het die VGK se konsulent, ds. Johan Julies gesê. Die kerk beoog 'n hele klompie aktiwiteite met die hoogtepunt wat in Oktobermaand sal geskied, het hy genoem. Op die foto verskyn die massakoor van die VGK wat Sondagoggend so voortreflik opgetree het.  * Foto: Nick Pretorius

GEMSBOK-KAKAMAS: Mev. Hendrina Bruwer begin 6 November 1989 werk by Kokerboom Oord tehuis vir bejaardes. 
Op 31 Maart 2025 tree sy af . 35 jaar en 5 maande diens by 1 instansie.
 ‘n Wonderlike mylpaal en ‘n voorbeeld van toegewydheid en lojaliteit teenoor ‘n instansie. 
Sy doen diens onder 5 verskillende bestuurders, verskillende bestuursliggame, personeel wat kom en gaan, en dan is daar die inwoners wat ook gekom en gegaan het. 
Sy het alles beleef- vreugdes, hartseer en sommer net alledaagse dinge wat gebeur het. 

GEMSBOK-UPINGTON: Lekker vermaak is gereël vir vanjaar se Expo wat vanaf 29 - 31 Mei gehou word.
Michael Lindt, wat bekend is as omroeper by die skou, gaan as seremoniemeester en aankondiger optree. Hy sal ook die gaskunstenaar by die Bejaarde Funksie wees, wat soos gewoonlik, die Donderdagoggend aangebied word.
Donderdag om 14:00 is daar ‘n skole produksie op die hoof verhoog.
Donderdagaand om 19:00 word Upington se Skoukoningin gekroon.
 Vrydagaand se sangprogram begin om 19:00 met Armand Steenkamp, Ryno Velvet gevolg deur Loufi Vrydagaand wat die aand afsluit.

GEMSBOK-UPINGTON: Sedert 1970 lewer Trans Oranje Drukkers ‘n omvattende drukkersdiens aan die Upington-omgewing en Noord-Kaap. 
55 Jaar later vloei die ink nog sterk deur die are van hierdie besigheid. 
Hierdie drukkery spesialiseer in lithografiese drukwerk met hoogs opgeleide personeel met etlike jare diens. 
Sedert die laat 
negentigs is die maatskappy voortdurend besig met die opleiding van vakmanne deur die Suid-Afrikaanse Drukkerskollege met verskeie top studente.
‘n Goed opgeleide werksmag is noodsaaklik en daarom bly die deurlopende verbete-ring van vaardighede en die bemagtiging van die werksmag ‘n prioriteit vir die maatskappy. 
Die drukproses, veral lithografie, is ‘n baie gespesialiseerde proses om die gewenste eindproduk te kan lewer.

GEMSBOK-UPINGTON: Nadat ‘n foto van Sophie Van Wyk, wat voor ‘n bekende kettingwinkel in Upington in haar rolstoel sit - menigte internet gebruikers warm onder die kraag gehad het - het Gemsbok na Shoprite uitgereik om agter die kap van die byl te kom.
In die foto kan jy duidelik sien dat beton pilare aangebring is - wat rolstoel toegang tot die winkel verhinder.
Shoprite het intussen as volg reageer:
Die supermark het twee kliënte-ingange, waarvan een toegerus is met ‘n rolstoeloprit.

GEMSBOK-UPINGTON: ‘n Interessante program is vanjaar opgestel vir die Jeugskou wat jaarliks tydens die Upington Expo gehou word.
Die Jeugskou is oor al drie dae van die skou aangebied.
Die Jeugskou sluit die volgende afdelings in:
Vleisskaap, Vleisbok, Melkbok, Veselbok, Perde, Kulinêre Kunste, Afslaers en Fotografie.
 Kinders sal kan deelneem aan: 
29 Mei: Jeugskou Demonstrasie & Teorie eksamen.
30 Mei: Junior-Junior en Junior skouman.
31 Mei: Senior was en skouman, Afslaers en Kulinêre kunste (jnr & snr).

Die inskrywingsfooi per leerder beloop R100. Vir meer inligting kan die volgende persone geskakel word: Bennie Nortjé - 082 944 7086, Helena Nortje - 083 462 7296, Lara Visser (HS Upington) - 081 512 7886 of Jacolene Crafford (HMO) - 084 799 8032.

-

GEMSBOK-UPINGTON: Die Upington Landbou Expo, wat van 29 tot 31 Mei, aangebied word, gaan beslis die jaar sy naam gestand doen.
‘n Groot verskeidenheid diere en diereprodukte sal geskou en uitgestal word en verskillende inligtingsdae word aangebied.
Die bestuur van die Upington Landbou Expo is baie opgewonde om aan te kondig dat daar twee kampioenskappe gehou gaan word, naamlik die Dorper en Witdorper Streekskampioenskappe, asook die Arabierperd Kampioenskappe, wat deur die NK Arabierperdeklub aangebied word.
Dit sal die eerste keer in jare wees wat die perdeskou weer in die hoofarena gehou gaan word. 
Dit is ‘n 3-daagse skou waar perde op halter, ryklasse en dan Saterdag, die kampioene gekroon gaan word. Skougangers sal hierdie spogperde  in die hoofarena baie geniet. 

GEMSBOK-VREDENDAL: Die nuwe Red Ox Restaurant en konferensie sentrum het vroeg in Maart hul deure vir die publiek oopgemaak nadat die perseel heeltemal herbou en verander is.
Hier het die eienaar, mnr. Jean Lambrechts van NC Foumous Lodges-faam, homself weer oortref met die smaaklike dekor en ongelooflike uitsig oor die wingerde van die streek met die Matzikama-berge op die agtergrond.
Draai gerus van die N7 af en kom besoek die besondere plek.