GEMSBOK-KAKAMAS: Kagiso Dounalde Motlele van die plaas Dassierant; Chargo Trust, was die algehele wenner in die Agri Presteerder 2025 kompetisie.
Al die deelnemers van die kompetisie is by Lake Grappa onthaal waar sertifikate en kategoriewenners aangewys is.
Sedert 2010 het die Oranjerivier Produsente Alliansie (ORPA) die eerste kompetisie in die Benede Oranjerivier-streek gehou.
Orffer & van der Merwe Human Resource Practitioners het weer die kompetisie behartig saam met ‘n span beoordelaars. Die prysuitdeling, bygewoon deur die verskillende plase se landbouwerkers, bestuurders en eienaars, asook die hoofborge van Sanlam.
Beoordelaarspaneel het bestaan uit Marius Orffer en Christa Silver van Orffer & van der Merwe, dr. Andries Daniels van die Vine Academy and Model Farm en Elsa Jones van die Gemsbok koerant. Lovey Masowa was weer die tolk wat dit moontlik maak dat almal mekaar verstaan.
Voor die sertifikate uitgedeel is, het dr. Andries Daniels, akademiese en opleidingsbestuurder by die Akademie, al die deelnemers geluk gewens en gesê hoe hy, en al die beoordelaars, so baie by die deelnemers leer.
Hy het toe voortgegaan om te sê dat hy by die Vine Academy en Model Farm werk waar die missie Learn Empower Grow is, waarvan die akroniem LEG is, wat so diepgaande is, want in die landboubedryf het jy as boer, werker, produsent ‘n sterk paar bene nodig, nie net om deur jou wingerde en boorde in die reën en hitte te loop nie, maar ook wanneer die ongunstige omstandighede ontstaan.
“Wanneer die storms kom, sal jy stewig op die grond kan staan met daardie sterk paar bene en nie val nie, maar om die storm te weerstaan en weer te begin loop en bou wanneer dit verby is.
“Hy noem dat, as die akademiese en opleidingsbestuurder by die Akademie, sy taak is om toe te sien dat die opleiding vlot verloop. Dat die deelnemers leer en verstaan waaroor die opleiding gaan. Alhoewel hy die deelnemers deur die assesserings vir die Trekkerbestuurder- en Onderhoudsopleiding geneem het, het hy steeds nie geweet hoe om self ‘n trekker te bestuur nie, tot die onderhoud met een van die trekkerbestuurders vir die kompetisie, wat dit so goed en in soveel detail verduidelik het dat hy gevoel het hy kon nou ook ‘n trekker bestuur.
“En dit het vir hom net die liefde en passie beklemtoon wat die kandidate wat vir die kompetisie ondervra is, vir hul werk en die landboubedryf het. Hoe goed hulle dit verstaan en bewus is van die holistiese prentjie. Hulle weet dat die bedryf sy volhoubaarheid moet handhaaf, want, soos hy altyd vir sy studente sê, is die landboubedryf die enigste bedryf wat jy ten minste drie keer per dag nodig het, vir ontbyt, middagete en aandete, want ons almal moet iets eet en drink, en sonder die landboubedryf sou daar niks wees om te eet en te drink nie.”
Daarna is die sertifikate deur Johan van der Merwe en Gabriel Viljoen (voorsitter van ORPA) uitgedeel.
