GEMSBOK-UPINGTON: In die Noord-Kaap was vyf amptenare betrokke by sake van finansiële wangedrag - waar R100 741,54 verlore gegaan het en slegs R1 999,98 teruggekry is
Noxolo Kiviet, minister van staatsdiens en administrasie, het onthul dat R1,5 miljard verloor is - weens finansiële wangedrag wat deur staatsamptenare in nasionale en provinsiale departemente gepleeg is.
In reaksie op navrae oor die dissiplinêre sake waarna verwys word in die verslag deur die Staatsdienskommissie wat onlangs in die Parlement ter tafel gelê is, het Kiviet gesê die Staatsdienskommissie het bevind dat die aantal finansiële wangedragsake soos aangemeld deur nasionale en provinsiale departemente 523 was tydens die 2021-22 finansiële jaar.
Kakamas waterprobleme steeds onopgelos
GEMSBOK-KAKAMAS: Dit lyk asof die probleme met die waterkwaliteit van die Kai !Garib Munisipaliteit in Kakakams net eenvoudig nie onder beheer kom nie.
Skaars twee weke gelede het inwoners van die Langverwachtwoongebied op sosiale media gekla - dat hulle kraanwater onbruikbaar is.
Die woordvoerder van die Kai !Garib Munisipaliteit, Mary-Ann Pienaar, het aan die Gemsbok ‘n persverklaring uitgereik - waarin ‘n foutiewe klep in die sisteem as die rede vir die koffie-kleurige, slegte reuk, kraanwater van Langverwacht uitgekryt is.
Hospitaalpasiënt hang homself op
GEMSBOK- POSTMASBURG: Die Delportshoop-polisie het ‘n geregtelike doodsondersoekdossier geopen nadat ‘n manlike pasiënt in ‘n saal by die Postmasburg-hospitaal gehang gevind is.
Die pasiënt is glo in die hospitaal opgeneem nadat sy familie hom op 23 Oktober daarheen gehaas het.
Die oorledene is op 26 Oktober deur ‘n vroulike pasiënt gevind, waar hy in sy kamer gehang het.
Sy familielede het die hospitaal van “nalatigheid” beskuldig en hulle beplan om regstappe te neem - aangesien hulle sê die pasiënt “nooit behoorlik versorg is nie”.
Block steeds agter tralies
GEMSBOK-UPINGTON: Die departement van korrektiewe dienste het gerugte dat die voormalige Noord-Kaapse LUR vir Finansies, John Block op parool vrygelaat is, weerlê.
Dit volg op ‘n Noord-Kaapse hooggeregshofbevel in September wat die Upington-korrektiewe toesig- en paroolraad opdrag gegee het om sy besluit om Block-parool te weier, te hersien.
Die voormalige LUR van Finansies, Ekonomiese Ontwikkeling en Toerisme in die Noord-Kaap - dien sedert 2016 ‘n 15 jaar vonnis uit vir korrupsie.
‘n Woordvoerder van Korrektiewe Dienste, Singabakho Nxumalo sê Block sal eers vir parool oorweeg word - nadat hy sy minimum vonnis uitgedien het.
Vioolsdriftskietery skok gemeenskap
GEMSBOK-VIOOLSDRIFT: Die polisie ondersoek ‘n skietvoorval by Vioolsdrift in die Noord-Kaap waarin ‘n prokureur van Knysna en ‘n boer van die Overberg in die Wes-Kaap dood is.
Die verdagte, die 59-jarige Jacob (Japie) Dawid Malan Claassens van Vioolsdrift, het reeds Dinsdag, 31 Oktober in die Springbok-landdroshof verskyn, het kol Cherelle Ehlers van die Noord-Kaap SAPD Mediasentrum gesê.
Ehlers het gesê die skietvoorval het Maandag, 30 Oktober, omstreeks 04:30 plaasgevind.
Vier mans het glo by die verdagte op die kleinhoewe in Vioolsdrift gekuier - toe bure Maandag in die vroeë oggend-ure geweerskote gehoor en ondersoek gaan instel het.
More Articles …
