Klerksdorp Record - Community News

Egpaar vier 65ste huweliksherdenking

Klerksdorp Rekord, Klerksdorp - Hettie en James Cunningham het baie sakke sout saam opgeëet en kyk nou na ‘n huwelik van 65 jaar terug en besef dat dit meer suiker as sout was.

Die egpaar het hul 65ste troudag op Woensdag 28 Mei gevier. Albei is nou 86 jaar oud.

Klerksdorp Rekord het hulle vroëer die week by hul woonplek in Panoramapark besoek, waar hulle tussen koek en tee gesê het daar is niks spesiaals beplan vir dié mylpaal nie. Op hul goue bruilof 15 jaar terug is daar fees gevier, want dit was darem ‘n groot mylpaal.

Duisende Stilfonteiners teken petisie

Klerksdorp Rekord, Stilfontein - Meer as 2100 huishoudings op Stilfontein het ‘n petisie onderteken oor die verval van infrastruktuur en talle ander diensleweringskwessies wat verlede week aan Matlosana se burgemeester oorhandig is.

Die VF Plus se provinsiale leier, Michal Groenewald, self ‘n inwoner van Stilfontein, het die petisie oorhandig as deel van die wetlik voorgeskrewe openbare deelnameproses oor die opstel van ‘n begroting vir die komende finansiële jaar. Dit is onderteken deur 2127 huishoudings in Stilfontein.

Siek skoolseun benodig hulp vir ’n oorplanting

Klerksdorp Rekord, Klerksdorp - ‘n Klerksdorpse laerskoolseun veg steeds kliphard teen bloedkanker. Chris Grobler se bloedkankertelling is hemelhoog.

Laerskool Saamtrek het laer getrek rondom die familie en help om fondse in te samel vir mediese onkostes, want die gesin se mediese fonds is reeds uitgeput. Chris en Chinel, sy tweelingsussie is in gr 7 in die skool.

“Ten spyte van sy pyn en al die hospitaalbesoeke, bly hy glimlag en is ‘n inspirasie vir almal rondom hom,’’ het Petru Myburg van die skool gesê.

Afrikaans-letters kry tuiste by die Monument

Klerksdorp Rekord, Klerksdorp - Die reuse- driedimensionele letters wat “Afrikaans” spel en ’n landwye draai gemaak het as deel van die 100ste bestaansjaarviering van Afrikaans as amptelike landstaal, het op Dinsdag 27 Mei eindelik by die Voortrekkermonument in Pretoria aangekom. Dié geskiedkundige oomblik is met groot opgewondenheid en trots gevier.

Ná ’n wye tiekiedraai tot in die Kaap en terug, is die Voortrekkermonument die trotse tuiste van dié letters vir die res van 2025.

’n Aand om te onthou vir Triest se gaste

Klerksdorp Rekord, Klerksdorp - Dit is vir hulle soos ‘n matriekafskeid, maar eintlik is dit nie.

Vir die kliënte by Triest Sentrum vir Intellektueel Gestremde Volwassenes is hulle Glitz & Glamour Gala ‘n aand van prag en praal. Waar hulle hul mooiste en blinkste uitrustings kan aantrek, op ‘n rooi tapyt kan stap en die aand om dans. “Amper soos ‘n matriekafskeid,’’ glimlag Johan Gerber wat die sentrum bestuur.

“Elke jaar sit ‘n klompie plaaslike borge koppe bymekaar om vir ons inwoners ‘n stylvolle aand te verseker. En daarvoor kan ons nie genoeg dankie sê nie.’’