GEMSBOK-UPINGTON: Die twee Martiz-broers, Gerhard en Johan Maritz, het onlangs aan wêreldklas kompetisies in Bloemfontein deelgeneem.
Hulle skiet al van jongs af. Gerhard en Johan Maritz het grootgeword op hul ouers se plaas (Broden), waar hulle as jong seuns al kennis gemaak het met gewere wanneer daar gejag word .
Hul ouers, Johan en Ina Maritz, het albei Protea kleure in  Bisley Skiet, gevolglik  wou hulle in dieselfde voetspore volg. 
Pa Johan moes sorg dat hulle die regte toerusting kry en so was hulle in ‘n goeie leerproses.
In hul vroeër hoërskooljare het hulle reeds aan die jaarlikse SA Bisley Kampioenskappe  op die De Wet Skietbaan buite Bloemfontein deelgeneem.

Kayla King, het verlede week aan die S A Saal-perd Nasionale Kampioenskappe in Bloemfontein deelgeneem. Sy het aan die 3-gang kinder ryperd onder 18jaar afdeling, met Legolas gery, onder afrigter Stephne Krugell. Kayla het ‘n welverdiende 3de plek op die Bloemskou verower en dit op ‘n wildvreemde perd.  Voor dit, het sy maar nog net drie keer in die baan met Legolas geoefen - welgedaan.

Future Stars FC, het as jong klub al hul stempel afgedruk in liga wedstryde.
Die klub is amptelik  in 2021 gestig en het in die O/17 Dawid Kruiper Ontwikkelingsliga deelgeneem. 
In 2023 eindig die span tweede in die O/17 Ontwillelingsliga. Tans bestaan die klub uit ‘n O/13, O/15 en ‘n senior span, wat in die Super Promotional League deelneem.

GEMSBOK-UPINGTON: Saterdag, 27 April 2024. bied Noord-Kaap Sierduifvereniging hulle streekskou aan in Upington op die skougronde in die Max Minnaar saal. 
Daar word 428 duiwe geskou deur 35 vertoners wat 45 rasse vertoon!. Daar is van die grootste rasse, Runts en Gross mondains, tot die kleinste ras, die Portugese tuimelaar! Verto-ners uit sewe provinsies kom neem deel aan die skou. 
Hierdie jaar is die streek bevoorreg om ook die Modena Prestige Skou aan te bied saam met die streekskou. Daar word 89 Modena’s  vertoon deur 9 Modena telers. Van die beste Modena’s in die land neem deel aan die skou. Dit is die ras met die meeste kleure, ‘n moet om te kom kyk.

Die Hoërskool Aggeneys  het die afgelope naweek behoorlik die vloer gevee met Hoërskool Carlton-Van Heerden se o.19-rugbyspan
 Carlton kon net nie al die gate toestop teen die swarttruie, wat  die wedstryd met 53-10 gewen het nie. 
Met rustyd was Aggeneys voor met 24-10 en in daardie stadium van die wedstryd het hulle teen ‘n sterk wind gespeel. Met die omdraaislag het hulle Carlton so te sê in ‘n stewige wurggreep gehad, waaruit  die bloues net nie kon los kom nie. 
Aggeneys se groot uitblinker was hul linkervleuel, Lorenzo Snyers, wat vyf keer oor die doellyn gaan kuier het. 
Die wenspan se Johan Jannetjies (2), Loyiso Cloete en Nathan Mostert het die ander drieë gedruk. 
 Vir Carlton het Damian Oliphant, hul losskakel, goed vertoon. Emmanuel Beukes het Carlton se enigste drie gedruk en Oliphant het met die doel en strafdoel geslaag.

Kenhardt Hoërskool het Carlton-Van Heerden o.19 hier op ‘n pragtige grasoppervlakte van Rosendal se sportveld welverdiend met 24-7 geklop. Carlton het met ‘n lustelose vertoning vorendag gekom en het by tye goue geleenthede deur hul vingers laat glip. Daarteenoor het die besoekers hul kanse deeglik benut en was hulle op die dag se sel beslis die beter span. Kenhardt was rustyd voor met 7-0. Nà die omdraaislag het Kenhardt met mening die krane begin oopdraai en nog drie drieë gedruk. Kenhardt se groot uitblinker was Carl Esterhuizen (buite- senter) wat twee puik drieë vir sy span gedruk het. Carlton kon net antwoord met ‘n enkele drie deur sy slotvoorspeler Christiano Snyders wat man alleen sy hart uitgespeel het.

Janco Wandrag, ‘n graad 8 leerling van die Hoërskool Duineveld, het Saterdag 6 April aan ‘n “offroad” motorfiets “race” deelgeneem in Windsorton.  
Janco was die jongste deelnemer in sy afdeling.  Dit was ‘n nat en modderige baan maar ten spyte daarvan het Janco die beste tyd op die baan gery en as die algehele wenner 
weggestap!

Die tweekamp kampioenskappe van 2024, wat op 29 en 30 Maart in Bloemfontein plaasgevind het, was die grootste byeenkoms in die 47-jarige geskiedenis van die glans geleentheid. Meer as 965 atlete het meegeding vir die titel van beste tweekamp-atleet in Suid-Afrika. Hierdie jaar was ‘n puik jaar vir die Griekwa span wat meer as 100 atlete gehad het wat in hierdie wonderlike gesinsport kompeteer het. 
Gesinne het saam meegeding, wat een van die redes is waarom hierdie sport so gewild is. 
Tannie Bossie Breedt (masters 70+) wat vierde geëindig het, het saam met haar kleinseun Phillip Riley deelgeneem, wat net weereens wys die sport bring families en mense saam op die baan.

Die NC Pro’s sokkerspan van Kathu - wat die pas afgelope Paasnaweek se groot uitdaagsokkertoernooi by die Dicky Jacobs-sokkerstadion gewen het. Hier is die besoekers met hul reserwes wat Upington se Tornado sokkerklub met 4-2 geklop met. Die toernooi het op Goeie Vrydag begin en Paas Maandagaand geëindig. 
(Foto: Nick Pretorius)

 47 Skole/junior klubs, 278 spanne, 1237 atlete en 142 afrigters -so het vanjaar se SA Junior Toutrek Kampioenskappe  gelyk. 
Postmasburg se Gemsbokkies toutrekklub het saam met Suid-Afrikas se top toutrekspanne aan hierdie uitmergelende, maar opwindende kompetisie deelgeneem en die kinders moes hard werk om hulle plekke in die top 7 te behaal.
Hierdie was die Gemsbokkies se eerste SA’s en hulle het baie spanne laat sweet!

Die Hoërskool Upington se skuts het weereens kolskoot geskiet by die Noord-Kaap Liga 2 by Oranje Noord. So lyk hulle uitslae:
o/14 Veergeweer :
Carla Hanekom : 2 x goud
o/16 Veergeweer :
Johan Serfontein : 2 x goud
Erns Mostert : 2 x silwer
o/21 Veergeweer :
Jascha Scheepers brons in 10m staan

Met die rugbyseisoen reeds in volle swang het die Kalahari-krieketspelers die afsluiting van die JTG Krieketseisoen in styl afgerond en beide die o/16- en o/19-trofeë gewen.
Die Kalahari Gold-span het die o/16-trofee verdedig in die finaal wat op 15 Maart plaasgevind het. 
Weereens het die twee Kalahari o/16-spanne in die finale wedstryd gespeel wat die huidige sterkte van Kalahari-krieket in die JTG-liga bevestig.
Die Kalahari Eagles het die JTG o/19 30 Over-liga gewen deur Kathu met 9 paaltjies in die eindstryd te klop.