GEMSBOK-KAKAMAS: Ernestine Sharon Michelle Daters  van Green Valley Nuts was die algehele wenner in die Agri Presteerder 2024 kompetisie.
Sedert 2010 het die Oranjerivier Produsente Alliansie (ORPA) die eerste kompetisie in die Benede Oranjerivier-streek gehou.  Orffer & van der Merwe Human Resource Practitioners het weer die kompetisie behartig saam met ‘n span beoordelaars.  Die prysuitdeling, bygewoon deur die verskillende plase se landbouwerkers, bestuurders en eienaars, asook die hoofborge van Sanlam.
Marius Orffer het tydens die prysuitdeling gesê dat daar verlede jaar 71 inskrywings was, hierdie jaar was daar 112 inskrywings, wat 58% toename is.  Hy het al die eienaars en  bestuurslede van elke plaas bedank wat hierdie jaar hulle personeel genomineer en ingeskryf het.

GEMSBOK-UPINGTON: Soos almal reeds bewus is het die NG Kerk Upington-Wes laasjaar 'n baie geslaagde Poppiedag Herdenkingsdiens gehou en beoog om die jaar nog meer mense te trek.  ALLE huidige dienende lede in enige van ons Magte en hul families asook all veterane met hul families word dus hartlik uitgenooi. 
Poppiedag word Wêreldwyd herdenk op die 11de van die 11de maand elke jaar of dan die naaste Sondag aan die 11de. Met die diens gee ons erkenning aan almal wat tydens oorlog konflik gesterf het maar betuig ons ook dankbaarheid teenoor die Vader vir hulle wat veilig kon terug keer na hul geliefdes. 

GEMSBOK-UPINGTON: Gesinsman, kerkman, sportman, gemeenskapsmens en onderwyser. Só kan mens Japie Orange kortliks opsom. 
Jacobus Orange (72) is Vrydagoggend omstreeks 04h00 in die hoë-sorgeenheid van die Upington mediese sorgsentrum oorlede ná ‘n kort siekbed van vier maande. 
Hy was ‘n oud-leerder van die Hoërskool Carlton-Van Heerden waar hy in 1970 gematrikuleer het. 
Sy onderwysopleiding het hy aan die Hewatt kollege in Kaapstad voltooi. 

GEMSBOK-UPINGTON: ’n 46-Jarige man, wat daarvan beskuldig word dat hy hom as ’n prokureur voorgedoen het, het homself vandeesweek in die hof bevind  - nadat hy deur die Rosedale-speureenheid gearresteer is.
Freddie van Wyk staan ​​tereg op ernstige aanklagte, waaronder sewe aanklagte van geldwassery en een aanklag van kubermisdaad.
Omphile Masegela, Noord-Kaapse polisiewoordvoerder, het onthul dat Van Wyk hom na bewering as ‘n prokureur voorgedoen het en sy slagoffers mislei het deur te beweer dat hy regsverteenwoordiging in arbitrasie-aangeleenthede teen ‘n fooi verskaf. 
Om sy beweerde bedrieglike aktiwiteite te bevorder, het hy homself valslik voorgestel as ‘n lid van die National Union of Metalworkers of South Africa (Numsa), en beweer dat hy gemagtig is om vakbondlede in arbitrasie- en Kommissie vir Versoening, Bemiddeling en Arbitrasie (KVBA) aangeleenthede te verteenwoordig. 

‘n Man wat geen inleiding nodig het nie. Sy merkwaardige loopbaan getuig van sy besonderse bydraes tot die wêreld van landbou. Johannes Fourie dien al sedert 2000 op Raisins SA se direksie en is spreekwoordelik voor in die koor met gesprekke wat die vooruitgang van internasionale landbouprodusente aanhits. 
Bo en behalwe sy onuitputbare passie en liefde vir boer, staan sy nederige hart en warm glimlag altyd uit. 
Johannes het al telke male groot rolle beklee, onder meer as direkteur van SAD, voorsitter van Dried Fruit Technical Services (2005 tot DFTS se samesmelting met Hortgro) waarna hy die voorsitter was van die nuutgevonde Raisins SA en hy het vir twee termyne gedien as voorsitter van die International Raisins Association. Hy staan plaaslik ook bekend as voorsitter van die Groblershoop Agricultural Association en dien op die bestuur van Agri Noord-Kaap. 

GEMSBOK-GROBLERSHOOP: Barbara Lynn Roos van Perfekte Kuur op Groblershoop, het onlangs twee seepkursusse aangebied.
Die eerste een was op Upington  vir Khoi en San-dames en op Noenieput vir die plaaslike dames daar.
Barbara Lynn het die kursus aangebied in samewerking met Nina Joubert van Agulhas Heuningbostee van die plaas Toekomst buite Bredasdorp.
Agulhas Heuningbostee, Toekomst plaas het vir Barbara Lynn gevra om ‘n seepkursus aan te bied met hul produk. Met die hulp van Nina Joubert en personeel, kon die twee besighede koppe bymekaar sit en die dag beplan - Upington se eerste seepkursus vir Perfekte Kuur.
Die dames wat gekies is deur hul stamverteenwoordigers, is vrouens betrokke by hul verskeie gemeenskappe. 
Agulhas Honeybush Tea is die eerste heuningbostee besigheid wat suksesvol met die Khoisan kon onderhandel en gevolglik hul BioTrade permit kon bekom. Die seepmaakkursus is Agulhas Honeybush Tea se eerste gemeenskapsprojek om vrouens in die Khoisan gemeenskappe te bemagtig om ook voordeel te trek uit heuningbostee produkte en terug te ploeg in hulle gemeenskappe.

GEMSBOK-UPINGTON: Jare lank loop oom Nico Steenkamp al met die gedagte om te skryf oor sy wedervaringe as bemarker van Karakoel pelse in die Kalahari, asook die boere wat hy ontmoet het.
Oom Nico (84 jr) het in 1960 as 20-jarige as bemarker by SAKK begin werk. Toe het hulle nog met sjielings en pennies gewerk. Hy sê hy het baie Ford bakkies opgery en duisende Karakoelvelle vir veilings na Upington aangery. Hy ken nou nog die X-nommers van die boere - na al die jare. Vandaar die titel van die boek, “Swartgoud van die Kalahari en talle stories”. Die Karakoel pelse het bekend gestaan as die “swartgoud van die Kalahari”.
Oom Nico Steenkamp het in Julie 2021 ernstig siek geword, geval, ’n heup operasie ondergaan en weer aangesterk.
Hy sê: “Met hierdie hele gebeurtenis het ek ‘n geestelike ervaring gehad wat my hele lewe positief verander het. Ook my geloof het baie sterk geraak. Ek is dankbaar vir my Here en Skepper vir ‘n wonderwerk wat in my lewe gebeur het”.
Na die ervaring, het hy besluit om al sy notas wat hy al so deur die jare bymekaar gemaak het, te boekstaaf. Riaan Viviers het al so lank gevra dat hy ‘n boek moet skryf en na hierdie ondervinding het hy besluit om dit te doen. Hy kon dit egter nie self doen nie en het die hulp van baie boere en sy mede-samesteller, Greta Schreuder, ingeroep.

GEMSBOK-KANONEILAND: African Vineyard op Kanoneiland nooi die gemeenskap en besoekers uit om deel te wees van hul jaarlikse kunsuitstalling op 16 November 2024, wat van 16:00 - 18:00 plaasvind. 
Hierdie geleentheid stel gaste in staat om kunswerke van kunstenaars uit ons omgewing te besigtig, met gratis toegang vir diegene wat slegs die uitstalling wil bywoon.
Na afloop van die kunsuitstalling, sal die gesogte Langtafel Ete om 18:00 begin. Die aand sal propvol heerlike kos en 'n gesellige atmosfeer wees, met 'n vyf-gang maaltyd voorberei deur Anel Marais van Kokkedoor Vuur & Vlam en sjef Jaco van African Vineyard.

GEMSBOK-UPINGTON: ’n Herrie het verlede week op sosiale media losgebrand nadat dit aan die lig gekom het dat die poskantoor op Upington nie voertuiglisensieskyfies kan druk nie. Die poskantoor het nie die nodige fondse gehad om die linte dadelik te vervang wat gebruik word om die drukwerk te doen nie. AfriForum het egter gou ingespring en toegesien dat inwo-ners weer hul voertuiglisensies by dié poskantoor kan hernu.
Sedert die Suid-Afrikaanse Poskantoor (Sapo) in sakeredding geplaas is, het honderde poskantore landwyd gesluit. Dit terwyl die oorblywende poskantore spook om met beperkte hulpbronne dienste te lewer. Talle inwoners op Upington was onlangs hewig ontevrede oor die stand van sake by Upington se poskantoor. In ’n poging om die situasie te beredder het Werner Strauss, AfriForum se distrikskoördineerder vir die Noord-Kaap, verlede week hierdie poskantoor besoek om AfriForum se hulp aan te bied. Die Upington-tak het besluit om nuwe linte aan te koop sodat dienslewering hervat kan word.

GEMSBOK-UPINGTON: Bentley Vass, Noord-Kaapse LUR  vir Korporatiewe Bestuur, Menslike Nedersettings, Tradisionele Sake, Vervoer, Veiligheid en Skakeling, het die Upington SAPD besoek om met plaaslike polisie in gesprek te tree, met die klem op dissipline en ywer terwyl operasionele aktiwiteite geëvalueer is om gemeenskapsveiligheid in die ZF Mgcawu-distrik te verbeter.
Provinsiale polisiewoordvoerder, sers Omphile Masegela, het berig die besoek het by die Upington-polisiestasie begin, waar die LUR met die waarnemende distrikskommissaris, brigadier Peet Coetzee, vergader het.

GEMSBOK-UPINGTON: Die 39-dae lange safari wat die Efficient Groep tans regoor Suid-Afrika onderneem, het ook op Upington aangedoen.
Dawie Roodt en spesiale gaste van Efficient ry met 'n vloot klassieke Land Rovers, Land Cruisers en ander voertuie om hoop te herstel en oplossings te bespreek vir die hedendaagse uitdagings wat Suid-Afrikaners in die gesig staar. 
Hierdie reis gaan alles oor eerlike, positiewe gesprekke. Gedurende die reis het die Efficient-span met Suid-Afrikaners (nuwe en bestaande kliënte) gepraat oor hul unieke uitdagings en hoe ons almal kan saamwerk om ons pragtige land te herbou. Die Efficient-span het by verskeie organisasies betrokke ge-raak en ‘n helpende hand uitgesteek.

GEMSBOK-KAKAMAS: Angelah Mnguni is ‘n pragtige 21-jarige jonge dame van Lutzburg Kakamas.
Sy het onlangs die Noord-Kaap verteenwoordig in die South Africa Championship Performance of Art International wat in Rustenburg gehou is.
Angela is lief vir die skoonheidswêreld en het al van kleins af aan kompetisies deelgeneem. Sy het sonder ouers grootgeword, maar dit het haar nie gekeer om haar passie uit te leef nie. ‘n Passie om jongmense te inspireer, my drome te bewaarheid en om aan jongmense te bewys dat omstandighede nie definieer wie jy wil wees nie.